Greva e minatorëve të bakrit në Spaç të Mirditës vijon edhe sot, teksa dhjetëra punëtorë kanë ndërprerë punën për të kërkuar paga më të larta, kushte më të sigurta në nëntokë dhe njohjen zyrtare të sindikatës së re që kanë krijuar.
Sipas përfaqësuesve të minatorëve, ata nuk do të rikthehen në punë pa u garantuar respektimi i standardeve dhe rregullave evropiane të sigurisë.
Në qendër të kërkesave të tyre është nënshkrimi i një kontrate kolektive pune që do të përcaktojë qartë detyrimet dhe të drejtat e punëtorëve, si dhe masat për përmirësimin e kushteve të sigurisë në galeritë e minierës.
Nga ana tjetër, kompania menaxhuese e minierës ka deklaruar se protesta është e “paligjshme” dhe se një pjesë e punëtorëve “nuk kanë respektuar oraret e punës”, duke paralajmëruar masa disiplinore nëse greva nuk ndërpritet.
Ndërkohë, minatorët bëjnë thirrje që qeveria dhe institucionet përgjegjëse të ndërhyjnë për të nisur dialogun dhe negociatat kolektive, në mënyrë që puna të rifillojë në mënyrë të qëndrueshme dhe të sigurt.
/vizionplus.tv
