Nga Ervin Sina
Superkupa e Italisë do të njohë sot në mbrëmje finalistin e dytë. Skuadra që do të rivalizojë Interin në finalen e datës 6 janar do të dalë nga çifti Milan-Juventus. Kemi të bëjmë me një klasike të futbollit italian ndonëse në këtë moment këto dy ekipe nuk janë në momentin më të mirë. Sidomos kuqezinjtë të cilët së fundmi u tronditën është nga shkarkimi i trajnerit Fonseka.
Në vend te tij ka ardhur një tjetër portugez, Serxho Konseisao, një trajner fitues tek Porto me 11 trofe në 7 vite. Veç rregullave më strikte dhe disiplinës së fortë, Konseisao do të ndryshojë edhe emrat dhe vendosjen në fushë. Skuadra do të kalojë në një 4-3-3 me Benaser në mesfushë mbështetur nga Rejnders dhe Fofana.
Në qendër të mbrojtjes kthehet Fikajo Tomori ndërsa në të djathtë talenti Himenez për ti lënë hapësirë në të majtë Teo Hernandezit. Tiago Mota nga ana tjetër do të vazhdojë të vendosë si mbrojtës të majtë Ueston Mek Kenin. Treshja Niko Gonzales, Kopmeiners dhe Illdiz do të mbështesin Vlahoviçin. Bardhezinjtë mund të mbështeten tek fakti që kanë humbur vetëm një nga 31 ndeshjet e fundit në të gjitha kompeticionet. Juventus është rekordmen kompeticioni me 9 trofe, ndërsa kuqezinjtë e kanë fituar 7 herë trofeun. Takimi transmetohet në Tring në orën 20:00.
