Presidenti Donald Trump ka kërcënuar Kinën se do të përballet me pasoja serioze nëse vërtetohet fajësia e saj për pandeminw, ndërsa 40 mijë njerëz në SHBA kanë humbur jetën dhe mbi 700 mijë janë infektuar.
DONALD TRUMP
PRESIDENT I SHBA
“Nëse ata janë përgjegjës me vetëdije, nuk po flas për gabime që mund të ndodhin, por nëse ata kanë vepruar me qëllim, po do të përballen me pasoja të pashmangshme. Pandemia mund të ishte ndalur në Kinë, ku ajo filloi, por nuk ndodhi dhe tani vuajnë të gjithë për shkak të saj”.
Administrata Trump ka akuzuar Kinën për mungesë transparence, ndërsa kreu i Shtëpisë së Bardhë, pak ditë më parë, pezulloi fondet për Organizatën Botërore të Shëndetësisë duke e akuzuar atë si Kinacentrike dhe se nuk e ka menaxhuar si duhet situatën.
Ndërkohë, masat kufizuese i kanë kushtuar SHBA më shumë se 22 milionë të papunë. Në disa shtete protestuesit kanë pushtuar rrugët duke kundërshtuar guvernatorët, të cilët këmbëngulin për shtyrjen e izolimit.
“Ne jemi akoma një vend i lirë dhe njerëzit duhet të vendosin vetë se si duhet të sillen. Nuk ka nevojë për masa të tilla detyruese”.
Edhe presidenti Donald Trump i ka mbështetur demonstruesit duke thënë se qytetarët janë të përgjegjshëm dhe është i nevojshëm rikthimi gradual i normaliteteit.
Në Minesota, Texas, Utah dhe vende të tjera, protestat vijojnë prej disa ditësh tashmë, duke rrezikuar edhe më shumë përhapjen e koronavirusit.
