Në konferencën e kësaj të enjteje, Presidenti i Republikës, Ilir Meta thumboi ndërkombëtarët. Ai doli sërish para mediave për të paraqitur sipas tij, fakte që tregojnë qartë sesi mazhoranca po bën grusht shteti dhe po kap Gjykatën Kushtetuese. Në fjalën e tij, kreu i shtetit tha se ka nevojë për të vendoset një monitor i madh edhe në Bruksel që edhe ata të njihen me “bëmat” e qeverisë.
“Në ditët që vijnë mund të vendosim dhe një më të madh dhe shumë shpejt mund ta vendosim dhe në Bruksel, në anglisht që të kuptojnë perlën e rilindjes, se si një organizatë rrëmben në mënyrë antikushtetuese, antiligjore dhe mafioze, anëtarët e Gjykatës Kushtetuese për të mos pasur më në të ardhmen Shqipëria Gjykatë Kushtetuese por polici antikushtetuese të regjimit të Lleshit.”
Më tej, ai ftoi këshilltarin e tij ligjor, Bledar Dervishi që të sqarojë me detaje shkeljet e mazhorancës dhe provat e reja që ka në dorë.
“Do ftoj këshilltarin tim ligjor Bledar Dervishaj për të shpjeguar me qetësi e drejtësi hap pas hapi si ka ndodhur puçi në bazë të provave të reja që u detyruan të na i sjellin vetëm dje pas insistimit për të mos i sjellë për ditë të tëra, vetëm pasi ne denoncuam publikisht QBZ që po shkelte Kushtetutën duke mos informuar Presidentin. T’u referohemi fakteve.”
Në datën 2 mars presidenti pret popullin në Bulevardin “Dëshmorët e Kombit” për të ndaluar grushtin e shtetit, sipas tij. Ai ka paralajmëruar se në këtë datë të gjitha institucionet që ndodhen në bulevard do t’i kthehen popullit.
