Qendra shëndetësore nr.2 në qytetin e Fierit është në gjendje alarmante për shkak të kushteve minimale të higjienës e sigurisë.
Kjo godinë e cila mbulon me shërbim shëndetësor 15 mijë banorë ndodhet në katin e tretë të një obiekti mes lagështirës e mykut, pa ashensor duke e bërë pothuajse të paarritshme për të moshuarit dhe pacientët me probleme të rënda shëndetësore.
Përballe kësaj situate qytetarët kërkojnë ndërhyrje të shpejtë për rikonstruksionin e saj, teksa theksojnë se braktisja shumëvjeçare nga institucionet përgjegjëse është e pajustifikueshme.
“Unë kam 26 vjet në Amerikë. Nuk them që të bëhet si në Amerikë. Unë jam 83 vjeç, të ngjitesh në gjithë ato shkallë është çmenduri”, thotë një i moshuar.
Ndërkohë po kaq e rëndë paraqitet situata edhe për personelin mjekësor të kësaj qendre të cilët u shërbejnë pacientëve mes lagështirës e mykut dhe ambienteve të pamjaftueshme.
Drejtoresha Shqiponja Hoxha, pohon se situata në godinën e qendrës shëndetësore nr 2.paraqitet problematike pasi hidroizolimi i taracës së objektit është i dëmtuar plotësisht duke shkaktuar problematika të vazhdueshme në ambientet e brendshme.
Për këtë arsye NjVKSH Fier i është drejtuar në mënyrë të përsëritur bashkisë, e cila ka realizuar një ndërhyrje të pjesshme që nuk ka ndikuar aspak në përmirësimin e gjendjes ekzistuese të objektit.
“Në këto kushte ka rreth 4 vjet. U bë një ndëryrje e pjesshme në dhjetor 2025, por sërish situata vazhdon të jetë në këto kushte. Shpresojmë që në vitin 2026 të bëhet rikonstruksioni. Apeli im është ndërhyrje sa më shpejt, ose transferim i ambienteve”, thotë drejtoresha Shqiponja Hoxha.
Ndërkohë Ministria e Shëndetësisë e ka përfshirë qendrën shëndetësore nr 2 në projektin e “Rikonstruksionit të ambulancave dhe qendrave shëndetësore për vitet 2025- 2026”, e megjithatë gjatë vitit 2025 projekti mbeti vetëm në letër.Rikonstruksion të shpejtë ose transferim kanë kërkuar njëzëri si qytetarët, ashtu edhe personeli shëndetësor./vizionplus.tv
