Para Këshillit të Lartë të Prokurorisë, kandidatët për drejtimin e SPAK u përballën me një seancë pyetje–përgjigjesh, ku u testuan mbi vizionin, integritetin, kapacitetet menaxheriale dhe aftësinë për të përballuar presionin e një prej detyrave më të ndjeshme në sistemin e drejtësisë. Diskutimet sollën në vëmendje problemet e brendshme të strukturës, nga ngarkesa e lartë e punës e deri te dilemat etike që shoqërojnë punën e përditshme të prokurorëve të posaçëm.
Pyetjeve të anëtarëve të KLP-së iu përgjigj i pari kandidati Adnan Xholi.
Ngarkesa e punës dhe kërkesa për më shumë prokurorë
Pyetja e anëtarit të KLP-së, Vatë Staka, mbi kërkesën për shtimin e numrit të prokurorëve, nxori në pah një nga sfidat më të theksuara.
Adnan Xholi theksoi se SPAK përballet me qindra fashikuj hetimorë, çështje që zgjasin me muaj, madje dhe me vite, dhe që kërkojnë përgjigje të shpejtë dhe të saktë.
“Nuk është ideja që të arrestojmë, por të hetojmë dhe të japim drejtësi në kohë të shkurtër,” u shpreh Xholi, duke nënvizuar se volumi i madh i çështjeve nuk mund të përballohet pa rritje të burimeve njerëzore.
Debati mbi etikën e hetimeve
Gjatë seancës, anëtarja e KLP-së, Arta Mandro, ngriti një pyetje delikate:
“Nëse do vihesh në pozitën që do më hetosh?”
Xholi u përgjigj duke theksuar se respekti njerëzor nuk cënon kurrë profesionalizmin:
“Do t’ju respektoj si femër. Mund t’ju sjell edhe një kafe, se te SPAK e pëlqejnë shumë kafen. Por përpara ligjit, nuk ka funksione.”
Brengat e professionit, shkarkimet dhe dilemat
Një tjetër shqetësim i ngritur ishte barra emocionale e kërkesave për shkarkimin e kolegëve magjistratë.
“Brenga më e madhe është kur kërkoj shkarkimin e kolegëve të mi. Edhe kur jam i bindur, mbetet brengë,” u tha në sallë.
A duhet të prevalojë interesi i vendit apo i dosjes?
Për Xholin përgjigjja ishte e qartë: “Për prokurorin ka rëndësi fakti.”
Dalja e dosjeve në media
Erind Mërkuri ngriti çështjen e rrjedhjes së informacionit hetimor drejt mediave.
Xholi theksoi se përgjegjësia për ruajtjen e dosjeve mbetet e vetë prokurorëve:
“Nuk ka pse t’i jepet dënimi të pandehurit nëpër ekrane. Nëse dosja del, atëherë faji është tek ne.”
Ndikimi te familja dhe standardi i punës
I pyetur për ndikimin e punës tek jeta private, Xholi u tregua i sinqertë:
“Ka ndryshuar cilësia e jetës. Unë dhe familja ime nuk jemi më të parët.”
Ai shtoi se standardi i lartë i SPAK është meritë e prokurorëve, ndërsa:
“Unë marr përsipër dështimin, suksesi është i tyre.”
