Një ngjarje e rëndë tronditi Italinë mëngjesin e sotëm, pasi 22-vjeçarja shqiptare Ilaria Sula, e zhdukur prej 25 marsit, u gjet e vdekur. E reja shqiptare ishte vrarë nga i dashuri i saj filipinez Mark Antony Samson, pasi ajo kishte vendosur që të ndaheshin. Trupi i Ilarias u gjet brenda një valixheje, i hedhur në një greminë.
Babai i të resë, Flamur Sula, duke folur për mediat italiane, ka rrëfyer momentet e fundit të komunikimit me të bijën dhe shqetësimin që pati më pas. Ai tha se biseda e fundit me vajzën e tij nuk ishte si zakonisht, edhe pse ajo këmbëngulte se ishte mirë dhe nuk duhej të shqetësohej. Pikërisht kjo frazë e kishte bërë të dyshonte edhe më shumë.
Lexo edhe :
Related Posts
“Hera e fundit që folëm me Ilarian ishte e martë dhe na tha se do të kthehej në shtëpi të shtunën. Ajo jeton me shoqet e saj në Romë, ku ndjek universitetin. Ajo ishte telefonata e fundit, pastaj morëm disa mesazhe nga celulari i saj që shkruante: ‘Përshëndetje, babi, mos u shqetëso. Jam mirë. Kam dalë me një djalë dhe një vajzë. Do të kthehem në Terni pas një muaji.’ Pastaj më përsëriste: ‘Mos u shqetëso, jam mirë.’ Kjo gjë na shqetësoi, sepse po të ishte vërtet vajza që po shkruante, do të më telefononte,” tregon ai.
Më tej Flamuri tha se pas disa ditësh mungesë komunikimi, ai ka bërë denoncimin në polici më 29 mars për zhdukjen e vajzës së tij, dhe një ditë më pas është takuar me filipinezin Mark Antony Samson.
Ai ka rrëfyer se i riu ishte shprehur i pikëlluar për zhdukjen e saj, madje dhe e kishte përqafuar.
“Të shtunën shkuam për të bërë denoncimin për humbjen e saj. Më pas, të dielën, takuam në komisariat të dashurin e vajzës time, nuk e dinim që ata ishin ndarë. Ai na tha se ishte shumë i pikëlluar dhe ishte i shqetësuar për humbjen e saj. Dukej i qetë dhe më dha edhe një përqafim,” rrëfen Flamur Sula, babai i Ilarias.
Mediat italiane shkruajnë se sipas burimeve mjeko-ligjore, ajo vdiq të paktën 48 orë para se të gjendej, ndërsa pritet që në vijim të caktohet edhe ekipi mjeko-ligjor që do të bëjë autopsinë.
Zbulimi i trupit
Trupi i të resë u gjet në një zonë të pyllëzuar pranë komunës së Polit, brenda një valixheje. Agjentët po kryejnë hetime në lagjen Africano, brenda një apartamenti ku dyshohet se ajo mund të ketë kaluar ditët e fundit.
I dashuri 23-vjeçar i saj ndodhet në arrest. I riu me origjinë filipinase dyshohet se e vrau vajzën duke e goditur me thikë në një apartament në kryeqytet dhe më pas e largoi trupin pasi e kishte mbyllur në një valixhe. Ai do të merret në pyetje nga prokurorët për të hedhur më shumë dritë mbi ngjarjen.
Ishte analiza e tabulateve të telefonit që inkriminuan të dashurin e Ilarias. Djali, një filipinas njëzet e tre vjeç, dyshohet se përdori telefonin e së resë për të postuar në profilin e vajzës së zhdukur në rrjetet sociale.
Rindërtimi
Ilaria ishte larguar nga shtëpia me qira ku jetonte me shoqet, por nuk ishte kthyer më. Mbrëmjen e së martës së kaluar pati një shkëmbim mesazhesh në WhatsApp me shoqet e shtëpisë, të cilat, pasi panë që nuk ishte kthyer, e telefonuan.
Por celulari i saj rezultonte i fikur. Familjarët, së bashku me shoqet, nuk morën më asnjë përgjigje. Të shqetësuar, prindërit e Ilarias bënë denoncim në polici.
Vijojnë hetimet për zbardhjen e plotë të ngjarjes. /Vizionplus.tv/
