“Më ndjekin njerëz! Duan të më vrasin”/ Flet babai i autorit të sulmit në xhami

Babai i Rudolf Nikollajt, 34-vjeçari që sulmoi me thikë 5 besimtarë myslimanë, ka rrëfyer se djali i tij vuante nga çrregullime të shëndetit mendor. Ai tha se gjendja e tij shëndetësore u përkeqësua pas ardhjes nga Maqedonia e Veriut, ndërsa tha se ishte shtruar 5 herë në spitalin Psikiatrik.

Babai i 34-vjeçarit tregoi se shumë herë i biri i fliste për persona të panjohur që e ndiqnin vazhdimisht, me qëllim për ta vrarë.

Më tej, ai deklaroi se Rudolfi kishte frekuentuar xhaminë që në gjimnaz. Mirëpo, sipas tij, ai nuk pranohej nga shumë besimtarë, të cilët e konsideronin si “kaur”.

“Ai u çonte natën disa herë. Unë mendoj se ka pasur kërcënime. E kanë ndjekur njerëzit. Unë i kam thënë; nëse ke borxhe, t’i paguan babi, sa lekë të jenë. Ai më ka thënë; më ndjekin shumë njerëz nga pas. E largova nga shtëpia tek stadiumi ‘Qemal Stafa’ i gjeta një tjetër me qira. Gjasme sikur ishte vend i keq që e ndiqnin njerëzit. E pyeta: “A të ndjek kush më?”. Ai më tha: “Vazhdojnë të më ndjekin po ata persona”. Edhe ai tek ajo xhamia tek Rruga e Kavajës, rrallë herë ka shkuar me u fal. Ai u pat larguar prej xhamisë tek Rruga e Kavajës, shkonte në xhami tjetër. I pata thënë, mos ik or bab në xhami. Meqë e sheh se nuk të duan njerëzit aty, se të thonë: ‘Je kaur e do me na prish’. Këtë punën e xhamisë e ka vazhduar që në shkollë të mesme, të falmen që në shkollë të mesme. Kam parë njerëz që i kanë ardhur çunit tim afër, ishin nga Peshkopia. Çuni është i degraduar, ose e ka nga stresi që e kanë kthyer në Rinas. Ka 6 fëmijë, i kam rritur me shumë halle. Jam katolik. Kur erdhi kjo koha e demokracisë, një hoxhë që rrinte këtu i merrte fëmijët dhe tentonte t’i kthente fëmijët në myslimanë. Më pas nisi djali duke u falur.”