Gjatë 24 orëve të fundit janë raportuar 40 vatra zjarri në të gjithë territorin e vendit, nga të cilat 6 vijojnë të jenë aktive, 9 janë nën mbikëqyrje, ndërsa 25 janë shuar plotësisht.
Sipas Ministrisë së Mbrojtjes, në përballimin e situatës janë angazhuar 492 forca operacionale vendore dhe lokale, si dhe 36 automjete zjarrfikëse. Në mbështetje të operacioneve kanë qenë edhe Forcat e Armatosura me 133 efektivë, një helikopter, dy automjete zjarrfikëse, 13 mjete, një dron dhe një autoambulancë.
Në qarkun Tiranë, zjarri në Malin e Dajtit vijon të jetë aktiv, por pa rrezik për zonat e banuara. Gjatë ditës së sotme, 30 efektivë të Forcave të Armatosura do të angazhohen në Dajt për mbështetjen e operacioneve në terren. Ndërkohë, vatra në Malin me Gropa është izoluar dhe vijon të mbahet nën monitorim.
Në qarkun Dibër janë aktive vatrat në Lundre–Madhesh, Cerrujë/Mali i Allushit dhe Selishtë. Në këto zona po punojnë strukturat zjarrfikëse, pyjore, bashkiake dhe të emergjencave civile. Vatra në Qafën e Helmesit vijon të jetë nën mbikëqyrje.
Në qarkun Shkodër, aktive mbetet vatra në Porav, Fushë-Arrëz. Ndërkohë, zjarret në Rragam–Bardhaj–Myselim dhe Malin e Tërbunit janë nën mbikëqyrje. Sipas autoriteteve, nuk raportohet rrezik për banesat në këto zona. Gjatë ditës së sotme, 20 efektivë të Forcave të Armatosura do të angazhohen në Rragam.
Në qarkun Fier vijon të jetë aktive vatra në Çërrilë, Mallakastër, në një zonë me pyll pishe, lis dhe shkurre. Gjatë ditës së djeshme, Forcat e Armatosura mbështetën operacionin me një helikopter, 32 efektivë dhe tre mjete. Sot, në terren do të angazhohen 30 efektivë të FA-së përkrah strukturave që vijojnë punën për shuarjen e zjarrit.
Në qarqet Lezhë, Elbasan dhe Korçë, vatrat e raportuara janë kryesisht të shuara ose nën mbikëqyrje.
Për ditën e sotme, Forcat e Armatosura kanë planifikuar angazhimin e të paktën 80 efektivëve në Dajt, Çërrilë dhe Rragam, në mbështetje të strukturave vendore dhe forcave të tjera operacionale.
Agjencia Kombëtare e Mbrojtjes Civile vijon monitorimin e situatës në të gjithë territorin e vendit, në koordinim me prefekturat, bashkitë dhe strukturat e sistemit të Mbrojtjes Civile.
Autoritetet bëjnë me dije se kapacitetet operacionale mbeten në terren dhe në gatishmëri për ndërhyrje, me prioritet mbrojtjen e jetës, banesave dhe pasurisë së qytetarëve.
