Policia e Sarandës ka finalizuar me sukses operacionin policor të koduar “Dishat”, duke goditur një rast të armëmbajtjes pa leje në fshatin Dishat, Konispol.
Në kuadër të operacionit, u arrestua në flagrancë shtetasi H. L., 50 vjeç, banues në këtë fshat. Gjatë kontrollit të banesës së tij, shërbimet e Policisë gjetën dhe sekuestruan një armë zjarri automatike dhe një karikator me 15 fishekë.
Operacioni u zhvillua në bazë të informacioneve të siguruara në rrugë operative, si pjesë e punës së vazhdueshme për parandalimin e ngjarjeve kriminale që mund të ndodhnin si pasojë e armëmbajtjes pa leje.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
/vizionplus.tv
