Në vijim të masave të marra për parandalimin e koronavirusit, pensionistëve do t’iu dërgohet pensioni në shtëpi. Kjo u konfirmua nga ministrja e Shëndetësisë, Ogerta Manastirliu, e cila tha se dërgimi do të bëhet me zero kosto.
“Posta të hartojnë një plan masash për të kufizuar kontaktet e punonjësve me publikun dhe për të shmangur grumbullimin e njerëzve në sportele. Pensionistëve do u dërgohet pensioni në shtëpi me kosto zero.”
Manastirliu kërkoi gjithashtu edhe nga privati që të marrë masa për parandalimin e përhapjes së virusit tek punonjësit gjatë aktivitetit të punës. Në mënyrë që të shmanget çdo lloj kontakti, ministrja bëri thirrje që shërbimi të ofrohet edhe online nëse krijohet si mundësi.
“Detyrohen të gjithë personat që kanë hyrë në Shqipëri, nga zona me risk, të komunikojnë online autoritetin përgjegjës Institutin e Shëndetit publik, nëse ata nuk e kanë plotësuar skedën e udhëtarit kur janë kthyer. Do të pezullohen të gjithë proceset dhe konkurset publike për punësim personeli apo shkollim, të gjithë qytetarët dhe subjekte të respektojnë këto masa që të mos vënë në rrezik shëndetin e tyre dhe të tjerëve. Ky urdhër do të pasohet edhe nga urdhra të tjerë, që nëse këto veprime nuk do të jenë rezultative, do të kemi më shumë masa për ruajtjen e sigurisë së qytetarëve”, shtoi mes të tjerash Manastirliu.
