Nga masat kufizuese që do të hyjnë të enjten në fuqi, baret dhe restorantet duket se do të jenë më të prekurit.
Për Enri Jahajn, masat e prezantuara sot nga Komiteti i Ekspertëve nuk do të sjellin rezultate pozitive, ndërsa vuri në dukje situatën e rëndë në të cilën ndodhen bizneset.
“Nuk prisinim ndonjë gjë nga masat e reja, nuk do të na shpëtojnë ato 2 orë nga situata. Situata është me të vërtetë e rëndë, nuk besoj që do të sjellë ndonjë dobi. Nga ana e biznesit, gjendja e rëndë vijon të rëndohet më shumë, nuk kemi parë asgjë nga shteti. Deri më sot, protokollet janë zbatuar, por janë zbatuar në mënyrë të pjesshme. Është një kaos i përgjithshëm. Kjo politikë nuk bëhet vetëm me aksione, por bëhet në mënyrë konstante, në çdo sekondë.”
Në një lidhje direkte me edicionin qendror të lajmeve në “Vizion Plus”, përfaqësuesi i Shoqatës së Bareve dhe Restoranteve tha se punësimi nuk cenohet me këtë kufizim të ri, mirëpo nuk mendon të njëjtën gjë për qarkullimin ekonomik.
“Punësimi nuk mendoj që do të cenohet. Sa i përket ekonomisë sonë, cenohemi shumë rëndë. Që nga fillimi i pandemisë, nuk kemi pasur asnjë mbështetje nga qeveria. Situata jonë vazhdon dhe bëhet më kritike. Na ka shkuar rripi aty ku nuk mban më. Zgjidhja më e mirë nuk bëhet duke shumëfishuar gjobat dhe duke panikosur njerëzit. Zgjidhja do të ishte të na mbyllin neve, bizneset, për dy javë, meqë jemi përhapësit e virusit, të na dëmshpërblejnë ne dhe punonjësit tanë për fitimin e munguar dhe pastaj të shohim si do të shkojnë shifrat.”
