Panairi më i madh ndërkombëtar i pasurive të paluajtshme që u zhvillua në Kanë të Francës dhe u përmbyll dje, mblodhi edhe këtë vit mbi 20 mijë investitorë, zhvillues dhe profesionistë të industrisë nga e gjithë bota. Në një event ku u prezantuan projektet më ambicioze të zhvillimit urban dhe turistik, projektet nga Shqipëria ngjallën mjaft interes, ndërsa një nga projektet që spikati më shumë ishte “Marina Orikum”, një projekt i “Concord Group”, grupit më të madh të investimeve në Shqipëri.
I prezantuar në pavijonin e Shqipërisë, mes rreth 85 projektesh zhvillimi, “Marina Orikum” u kthye në një nga pikat më të vizituara gjatë ditëve të panairit dhe përfaqësuesit e “Concord Group” realizuan një numër të madh takimesh dhe diskutimesh mbi mundësitë e bashkëpunimit dhe investimit.
Projekti synon të transformojë zonën e Orikumit në një destinacion të ri turistik dhe rezidencial në bregdetin shqiptar, duke integruar një marinë moderne për jahte, më të madhen në rajon, me rezidenca luksoze, hapësira hotelerie me 5-yje dhe shërbime turistike të standardeve ndërkombëtare. Koncepti është ndërtuar për të krijuar një destinacion multifunksional që kombinon jetesën elitare, turizmin dhe aktivitetet rekreative në një nga zonat më piktoreske të rivierës shqiptare.
Arkitektura e projektit është konceptuar nga arkitekti austriak Chris Precht, i njohur ndërkombëtarisht për projektet e tij inovative, që ndërthurin arkitekturën bashkëkohore me natyrën dhe qëndrueshmërinë. Vizioni i tij për “Marina Orikum” synon t’i japë jetë një koncepti modern që respekton peizazhin natyror të zonës dhe e kthen atë në një destinacion tërheqës për turizmin ndërkombëtar.
Interesi i shfaqur gjatë MIPIM 2026 konfirmon jo vetëm potencialin e këtij projekti, por edhe vëmendjen në rritje që Shqipëria po merr nga investitorët globalë në sektorin e turizmit dhe pasurive të paluajtshme. “Marina Orikum” shihet si një nga zhvillimet që mund të kontribuojë ndjeshëm në rritjen e standardeve të turizmit në vend, duke e pozicionuar rivierën shqiptare gjithnjë e më shumë në hartën e destinacioneve elitare të Mesdheut.
Ndërveprimi i “Concord Group” me palë të shumta interesi gjatë këtij eventi prestigjioz ndërkombëtar pritet të përkthehet në partneritete të reja dhe në rritje të vëmendjes ndaj projekteve turistike, me “Marina Orikum” si një stoli të jugut të Shqipërisë dhe si një projekt potencialisht premtues për zhvillimin e turizmit dhe investimeve në bregdetin shqiptar.
