Ditën e sotme po mbahet seanca për dosjen “5D” në Gjykatën e Posaçme. Të pandehur në këtë proces janë Mariglen Qato, Redi Molla, Taulant Tusha, Enton Punavija, Julian Zanaj, Albano Janku dhe Nestor Muhametllari.
Gjatë seancës së sotme ka dëshmuar ish-pronari i “IGOR Electric”, Eduart Meta dhe Petrit Muhameti, pronari i “Vas Konstruksion”.
Gazetarja e Vizion Plus, Blerina Cene ka siguruar dëshminë e Muhametit, i cili ka sqaruar njohejn me Mariglen Qaton.
Sipas dëshmisë, vëllai i Mariglen Qatos, Alfred Qato është martuar me gocën e tij. Muhameti thotë se dhëndri i tij, Alfred Qato i ofroi të bëhej pronar i “VAS Konstruksion”, ku nuk duhet të bënte asgjë, vetëm të firmoste.
Petrit Muhameti: Vëllai i Mariglen Qatos, është martuar me gocën time. Kam në pronësi një furrë buke. Ka afërsisht, 16-17 vjet që e kam. Një firmë VAS Konstruksion, mu ofrua të bëhesha pronar, nga viti 2016-2017. Ma ofroi dhëndri im, Alfred Qato. Ëshë një firmë e mirë më tha, do jesh pronar i kësaj kompanie. Nuk do bësh asgjë, ke staf për punën, vetëm do firmosësh. Hapa një llogari në bankë për të tërhequr lekët. Hapa një numër llogarie. Banka më niste njoftim, të tërheq shumën, 40 milionë lekë të vjetra. I merrja lekët, ia jepja Fredit, e shkonin në arkën e vogël të shoqërisë. Dy herë shkova në bankë.
Pas një viti e shita, se pata një operacion zemre. Doktori më tha duhet tu largohem streseve. I kërkova Alfredit të hiqja dorë. Kur e bleva nuk mora lekë, edhe kur e shita me 10 milionë lekë, nuk mora lekë. Nestori nuk më ka kaluar shumë monetare. Kur unë isha ortak, nuk njihja asnjë nga punonjësit. Kam shkuar një herë të kompania.
SPAK: Eduard Metën e njihni?
Dëshmitari: Më kanë pytur edhe te Byroja për këtë. Nuk e njoh zoti prokuror. Nuk e di kush është. Mora vesh se ky kishte kompaninë IGOR para meje, por tani e kam marrë vesh. Më tha Fredi që hap një numër llogarie. Fitimin e kompanisë do e procesonim nga banka. Më pëlqeu se thashë është punë me bankë. Puna ishte 25 minuta, ia jepja Fredit.
Nga 32 milionë lekë të vjetra, pasi ndërruam bankën, ia dhashë Nestorit, 4 herë. Shumat ishin 42 milionë më e madhja, 32, 37, 38, 40, 18 milionë ishte më e vogla. Më tha Fredi mua, ta takoja Nestorin.
Me Mariglen Qaton, kemi marrëdhënie krushqie. Në vitin 2006 erdhi se më vdiq babai. Në 2011, te dasma e vajzës dhe për ditëlindjen e nipit 10 vjet më pas. Tre herë e kam takuar. Për Redi Mollën e dëgjova për herë të parë në televizor, kur u arrestua për grupin 5D.
Mbrojtja, Ardian Leka pyet dëshmitarin
Petrit Muhameti: Administrator mora vesh ishte Nestori, në 2019. Fredi më tha. Nestorin e kam takuar 3 herë e mbaj mend tamam, por mund ta kem takuar dhe një herë të katërt. E takoja pranë bankës, në bllok. Firmosja unë në bankë për tërheqjen numri im i llogarisë. Asnjë qindarkë nuk kam marrë, asnjëherë. As nga shuma që kam dorëzuar nuk kam marrë. Fitimi më kishin thënë mua kalonte në bankë. Ato tërhiqja une. Afro 25 muaj ka zgjatur që unë kam shkuar, mund të shkoja një herë në 3 muaj, 4. Kur më sillte mesazh banka.
