Poliklinika e Specialiteteve nr. 3 apo siç njihet nga të gjithë si Poliklinika Qendrore është pajisur me aparatura të teknologjisë së lartë për specialitetet kryesore, duke filluar nga Kardiologjia dhe Urologjia e deri të Okulistika dhe ORL.
“Me këtë investim, mundësojmë fuqizimin e laborëtorëve dhe standardizimin e shërbimit në këtë Poliklinikë specialitetesh, sikundër po punojmë çdo ditë për të mundësuar një standard të njëjtë në të gjithë poliklinikat”, u shpreh ministrja e Shëndetësisë Ogerta Manastirliu gjatë inspektimit të Poliklinikës.
Manastirliu ka siguruar qytetarët se falë investimeve në poliklinikën qendrore do të shmangen ecejaket deri në QSUT, pasi të gjitha analizat mund të kryhen në laboratorin e ri.
“Nuk është më e nevojshme të shkosh në spital për diagnostikimin e sëmundjeve kardiake, sepse këtu kryhet me aparatura bashkëkohore prova e biçikletës, dhe defribilatorët janë modernë. Janë vendosur për herë të parë aparaturat e cistoskopisë dhe fluometrisë, për ekzaminimin e saktë të problemeve urologjike, janë kompletuar me aparatura të standardit më të lartë kabineti i okulistikës dhe ORL. Është një investim i plotë që transformon për nga pikëpamja e cilësisë së shërbimit këtë poliklinikë specialitetesh” – tha Manastirliu.
