Vitet e fundit numri i mjeteve elektrike po rritet në mënyrë të shpejtë në tregun vendas. Shifrat flasin se kemi 7600 mjete tërësisht elektrike në qarkullim.
Por rritja e importit të mjeteve shoqërohet edhe më një debat mes ekspertëve. Pjesa më e madhe e makinave janë importuar nga Kina. Ekspertët e tregut e shohin këtë realitet si një deformim të tregut, që me hyrjen në Bashkimin Europian pritshmëritë janë që t’i vihet fre.
“Fatkeqësisht origjina e mjeteve që po hyjnë në vend po dominohet nga Kina.Tashmë zhvillimi i tregut të makinave elektrike në Kinë po behët një realitet i papërmbajtshëm, që edhe Europa do ta ndjejë. Por ne në shtetin tonë kemi disavantazh, sepse pranojnë makina prodhim kinez pa standarde europiane”, tha Artan Mirdita, drejtor i “Albanian Motor Company”.
Por pse ekspertët janë të ndarë për përdorimin e këtyre makinave, pse ka kaq shumë debat mbi këtë temë?
“Në fund të ditës edhe kinezët prodhojnë makina që i përshtaten standardeve europiane. Por prodhuesit vet e pranojnë që nëse ata do të përdorin standarde europiane në prodhim, makinat do të dalin nga fabrika shumë më shtrenjtë. Ndaj mjete të tilla pa standarde europiane kanë probleme me sigurinë e jetës së përdoruesit. Në finale, Europa i ka dhënë më përparësi sigurisë së mjetit për të garantuar jetën”, u shpreh Mirdita.
Por çfarë do të thotë të qarkullosh me një makinë pa standarde europiane? Çfarë i diferencon mjetë të tilla elektrike që prodhohen në Kinë dhe ato në Europë?
“Jo vetëm sistemi frenimit, jo vetëm sistemi air beg-ve, por edhe sistemi robustitetit të kësaj makine nëpërmjet crash-testit, janë të gjitha elemente që ndryshojnë nga dy mjetet me orgjinë prodhimi nga Kina dhe Europa. Nuk ndodh një aksident njësoj, si me një makinë të pacertifikuar me një makinë të certifikuar. Nuk po përmend cilësinë e materialeve që përdoren për mjetet, që Europa kërkon cilësi më të lartë, duke nisur që nga materialet e ndërtimit e deri te rrezatimi elektromanjetik i të gjitha pjesëve elektrike që ka makina në përbërjen e saj”, sqaroi në “E-ZONE” Artan Mirdita.
Por objektivi i qeverisë është që brenda katër viteve të ardhshme Shqipëria do të anëtarësohet në BE. Me hyrjen në tregun europian, mjetet të tilla me orgjinë nga kontinenti aziatik parashikohet të kenë një frenim.
/vizionplus.tv
