Policia e Shkodrës ka arritur që të identifikojë numrin e shasisë të makinës tip “Range Rover Sport”, mjet i cili është përdorur nga atentatorët në masakrën e Shkodrës ku mbeten të vdekur 4 persona.
Makina luksoze rezulton të jetë e vjedhur në Durrës ku pronari i saj ka bërë denoncim pranë policisë më 19 prill të këtij viti. Jo vetëm kaq, por grupi hetimor ka gjurmuar mjetin në qytetin e Shkodrës ditën e ngjarjes së rëndë përmes kamerave të sigurisë, jo vetëm në afërsi të zonës së Dobraçit, por edhe në pika të tjera të qytetit.
Lexo edhe :
Related Posts
Kjo makinë është filmuar edhe në lagjen Kiras në afërsi të banesës të Astmer Bilalit. Megjithatë këto janë dyshime pasi nuk ka ende filmime që të vërtetojnë se ky mjet ka dalë pikërisht nga kjo shtëpi.
Një tjetër mister që ende nuk ka një përgjigje zyrtare është dhe identifikimi i personit që qëndron pranë trupit të pajetë të Hamza Licit.
Grupi hetimor ka dyshime të forta që ky person i veshur me të zeza është Ibrahim Lici, personi i tretë që ndodhej brenda mjetit tip S Class që po udhëtonin viktimat. Në foto madje duket edhe një punonjës policie që qëndron pranë personit misterioz, por nuk dihet pse efektivët nuk e kanë shoqëruar për të bërë të mundur identifikimin e tij.
Madje ka dyshime që ky person të jetë plagosur lehtë në këtë atentat.
Burime konfirmuan gjithashtu se janë kryer disa kontrolle në klinika private të Shkodrës për të parë nëse ky person ka marrë trajtim mjekësor apo jo, por nga këto kontrolle nuk ka rezultuar ende asgjë. /vizionplus.tv
