Franca do ta njohë zyrtarisht shtetin palestinez në shtator. Kështu ka bërë me dije presidenti Emmanuel Macron, nëpërmjet një postimi në rrjete sociale.
“Në përputhje me angazhimin historik të Francës për një paqe të drejtë dhe të qëndrueshme në Lindjen e Mesme, kam vendosur që Franca do ta njohë Shtetin e Palestinës. Do ta njoftoj këtë në një deklaratë zyrtare në Asamblenë e Përgjithshme të Kombeve të Bashkuara shtatorin e ardhshëm. Urgjenca më e madhe tani është të ndalen luftimet në Gaza dhe të ofrohet ndihmë për popullsinë civile. Paqja është e mundur. Duhet të arrihet një armëpushim i menjëhershëm, të lirohen të gjithë pengjet dhe të ofrohet ndihmë e gjerë humanitare për popullsinë në Gaza”, tha Macron.
Pas deklaratës së shefit të Elizes, ka ardhur edhe reagimi i kryeministrit izraelit Benjamin Netanyahu , i cili ka dënuar vendimin e Parisit.
“Ne e dënojmë fuqishëm vendimin e presidentit Macron për të njohur shtetin palestinez pranë Tel Avivit pas masakrës së 7 tetorit. Një veprim i tillë shpërblen terrorizmin dhe rrezikon krijimin e një ndërmjetësi tjetër iranian, ashtu siç është bërë Gaza. Një shtet palestinez në këto kushte do të ishte një trampolinë për shkatërrimin e Izraelit – jo për të jetuar në paqe pranë tij. Të jemi të qartë: palestinezët nuk kërkojnë një shtet pranë Izraelit; ata kërkojnë një shtet në vend të Izraelit”, deklaroi Netanyahu.
Vendimin e Macron e ka kundërshtuar edhe sekretari amerikan i shtetit Marco Rubio.
“Shtetet e Bashkuara e kundërshtojnë me force planin e Emmanuel Macron për të njohur një shtet palestinez në aamblenë e përgjithshme të Kombeve të Bashkuara. Ky vendim i pamatur i shërben vetëm propagandës së Hamasit dhe pengon paqen. Është një shuplakë në fytyrë për viktimat e 7 tetorit”, tha Rubio.
Nëse kjo ndodh, Franca do të bëhet shteti i parë anëtar në grupin e shtatë vendeve më të industrializuara që merr këtë hap për njohjen e shtetit palestinez.
