Kandidatja për drejtimin e SPAK, Doloreza Musabelliu, gjatë prezantimit para Këshillit të Lartë të Prokurorisë, shpalosi risitë dhe qasjen që synon t’i sjellë institucionit nëse merr drejtimin e tij. Ajo theksoi se një nga prioritetet kryesore do të jetë konsolidimi i hetimit financiar paralel me atë penal, një praktikë që sipas saj ka filluar të krijojë kulturë brenda SPAK-ut, por ende nuk zbatohet në mënyrë të plotë.
Musabelliu u shpreh se ky model duhet të shndërrohet në rregull bazë, ndërsa vuri theksin edhe te rëndësia e fuqizimit të frymës së bashkëpunimit mes prokurorëve, duke theksuar se drejtuesi është ai që motivon dhe orienton, por rezultatet prodhohen nga ekipi i prokurorëve.
Ajo foli gjithashtu për balancën mes dy prioriteteve madhore të SPAK, luftën kundër korrupsionit dhe krimit të organizuar, duke deklaruar se të dyja fushat duhet të ecin paralelisht, pasi janë shtylla të mandatit të institucioni. Në lidhje me ndërhyrjet apo sinjalet politike ndaj hetimeve të zyrtarëve të lartë, Musabelliu u pozicionua qartë: informim të prokurorit të çështjes dhe distancim nga çdo kontakt i mëtejshëm, ndërsa këshilla e vetme ndaj prokurorit do të ishte zbatimi i ligjit dhe Kushtetutës.
Pyetjet
-Çfarë risie do sillni ju në drejtimin e institucionit?
Musabelliu: Praktikat insitucionale, ato që duhen përçuar…është krijuar një frymë në SPAK të zhvillimit të hetimit financiar paralel me hetimin penal. Kjo është shumë e rëndësishme por nuk zbatohet në mënyrë absolute. Kjo do të vijojë të ekzistojë, duke u përmirësuar. Ky duhet të bëhet një rregull bazë. Po ashtu fryma e bashkëpunimit është shumë e rëndësishme, duhet të punojmë me komoditet të gjithë në mënyrë që puna të ecë. Drejtuesi është ai që motivon, jep frymë, por puna bëhet nga prokurorët aty.
-Ju thatë se prioriteti është lufta kundër korrupsionit në vitet e ardhshme. Nëse do të duhet të zgjidhni mes luftës ndaj korrupsionit dhe kuftës kundër krimit të orgazinuar, cili do të ishte priuoriteti numër një.
Musabelliu: Pyetje shumë e vështirë. Janë dy pikat bazë në të cilat ne kemi lëndën për të hetuar. Mendoj se duhet të ecim paralelisht. Nuk mund të lëmë pas dore as krimin e organizuar dhe as korrupsionin. Ne jemi të ndarë në seksione. Është shumë e vështirë të thuash “unë do t’i vë prioritet kësaj apo asaj”…
-Nëse një zyrtar i lartë është nën hetim dhe ju ju vijnë këshilla, sinjale për të rishikuar ritmin e hetimit të asaj çështjeje. Ju si drejtuese e intitucionit ndodheni përballë një dileme, ruajtjen e stabilitetit të vendit apo pavarësisë së prokurorit i cili ka në dorë hetimin e çështjes. Çfarë do bëni ju si drejtuese e instituciinit.
Musabelliu: Së pari do të informoja prokurorin e çështjes. Më pas do të shmangesha nga çdo kontakt i mëtejshëm. Këshilla që do t’i jepja prokurorit do të ishte të zbatonte ligjin dhe kushtetutën.
-Muajt e fundit ka një debat në lidhje me masat e sigurisë. Edhe në rezolutën e Kuvendit ceket kjo çështje. Çfarë do të bëni ju si drejtues në lidhje me këtë çështje?
Musabelliu: Në Prokurorinë e Posaçme janë 20 prokurorë dhe secili ka rastet e veta. Rasti rastit nuk i ngjan. Është prokurori ai që kur konkludon që ka faktin penal, provat e mjaftueshme për të atrbuuar një masë të caktuar, konkludon për të marrë një masë të caktuar. Para se të shkojë në Gjykatë prokurori bën një analzië. Më pas vjen Gjykata, e cila thotë “po kërkesa është e drejtë”. Sot me ndryshimet ligjore është Gjykata ajo që thotë po ose jo.
