Rusia duket se po prodhon gati tre herë më shumë municione artilerie sesa SHBA dhe Evropa, një avantazh kyç përpara asaj që pritet të jetë një tjetër ofensivë ruse në Ukrainë gjatë muajve në vijim.

Rusia po prodhon rreth 250,000 predha artilerie në muaj, ose rreth 3 milionë në vit, sipas vlerësimeve të inteligjencës së NATO-s, si dhe burime të njohura me përpjekjet perëndimore për të armatosur Ukrainën. Së bashku, SHBA dhe Evropa kanë kapacitetin për të gjeneruar vetëm rreth 1.2 milionë municione në vit për t’i dërguar në Kiev, tha një zyrtar i lartë i inteligjencës evropiane për CNN.

Ushtria amerikane vendosi një synim për të prodhuar 100,000 predha artilerie në muaj deri në fund të 2025 – më pak se gjysma e prodhimit mujor rus – dhe madje ky numër tani është i paarritshëm me 60 miliardë dollarë fonde për Ukrainën të bllokuara në Kongres, u tha një zyrtar i lartë  gazetarëve javën e kaluar.

Zyrtarët thonë se Rusia aktualisht po gjuan rreth 10,000 predha në ditë, krahasuar me vetëm 2,000 në ditë nga pala ukrainase. Raporti është më i keq në disa vende përgjatë frontit prej 600 miljesh, sipas një zyrtari të inteligjencës evropiane.

Mungesa vjen ndoshta në momentin më të rrezikshëm për përpjekjet luftarake të Ukrainës që kur Rusia marshoi për herë të parë drejt Kievit në shkurt të vitit 2022. Paratë e SHBA-së për armatosjen e Ukrainës kanë mbaruar dhe opozita republikane në Kongres ka ndalur në fakt më shumë fonde. /vizionplus.tv

 

Leave a Reply

Your email address will not be published. Required fields are marked *