Ambasadorja e SHBA-ve në Tiranë, Yuri Kim ka reaguar pas vendimit të Gjykatës së Posaçme të Apelit, e cila la në fuqi vendimin e Gjykatës së Shkallës së Parë, për ish-kryeprokurorin Adriatik Llalla, duke e dënuar me 2 vite burg.
Në një postim në “Twitter”, diplomatja amerikane përsëriti thirrjen e saj ndaj prokurorëve që të vazhdojnë të ndërmarrin veprime të tilla kundër zyrtarëve që keqpërdorin pozitën e tyre për t’u pasuruar.
“Më vjen mirë që shikoj se drejtësia po punon kundër zyrtarëve të korruptuar. Prokurorët duhet të vazhdojnë të ndërmarrin veprime kundër zyrtarëve – pa marrë parasysh sa të lartë apo të fuqishëm – të cilët keqpërdorin pozitën e tyre për t’u pasuruar. Askush nuk është mbi ligjin”, shkruan ambasadorja Kim.
Gjykata e Posaçme kundër Korrupsionit dhe Krimit të Organizuar (GJKKO) e ka shpallur fajtor ish-kryeprokurorin Adriatik Llalla, për “fshehje të të ardhurave”.
Vetë Llalla nuk ka qenë i pranishëm në seancën ku u vendos “fati i tij”. Sipas avokatit, shkak i mospranisë së Llallës në Gjykatë është shëndeti i tij, pasi ai ndodhet në spital. Mësohet se avokati paraqiti dokumentet se ish-kryeprokurori ndodhet në regjim spitalor, ndërsa i dha trupës gjykuese një ekspertizë që flet për gjendje të renduar shëndetësore të Llallës.
