Kolegji Zgjedhor zgjodhi sot me short trupën gjykuese që do të shqyrtojë kërkesën e opozitës, për çregjistrimin e listave të kandidatëve për zgjedhjet e 18 qershorit. Tomor Skreli, Sotiraq Lubonja, Gjin Gjoni, Ridvan Hado dhe Artur Malaj do të jenë anëtarët e trupës gjykuese, që do të shqyrtojnë padinë e opozitës. Relator, sipas shortit u zgjodh Gjin Gjoni.
Të mërkurën, Partia Agrare, në emër të opozitës, iu drejtua Kolegjit Zgjedhor duke kërkuar shpalljen të paligjshme të regjistrimit të kandidateve për deputete, ne zgjedhjet e 18 qershorit. Sipas opozitës, afati për regjistrimin e kandidateve, bazuar në Kodin Zgjedhor, ka përfunduar mesnatën e 28 prillit, ndërkohë që KQZ i ka pranuar listat ne datën 29, në kundërshtim me ligjin.
Ndërkohë, në një reagim në facebook, kryetari i KQZ Denar Biba është shprehur se Kolegji Zgjedhor nuk duhet të marrë parasysh kërkesën. Ai argumenton se kryetari i PAA-së Agron Duka, i cili ka përcjellë ankimimin pranë Kolegjit, nuk legjitimohet, pasi nuk ka paraqitur listat e partisë se tij.
.
