Kryeministri Edi Rama ka rikthyer vëmendjen te aksioni për lirimin e hapësirave publike nga ndërtimet pa leje dhe zaptimet e trotuareve nga biznese private. Në një postim në rrjetet sociale, ai ka publikuar pamje nga zona ku janë larguar tendat prej hekuri dhe ku trotuaret janë kthyer në funksion të qytetarëve.
Rama thekson se ky është një çlirim jo vetëm për kalimtarët, por edhe për klientët e lokaleve, të cilët tani mund të qëndrojnë jashtë në hapësira të hapura, pa xhama apo struktura të mbyllura, duke përfituar një ambient më cilësor shërbimi.
Megjithatë, kryeministri paralajmëron se ende ka ndërtime që nuk janë larguar, por sipas tij, është çështje kohe. Ai nënvizon se çdo ndërtim i paligjshëm do të shembet dhe ndërtuesit që nuk bashkëpunojnë do të përballen me gjoba të kripura.
Postimi i plotë:
Çlirim i madh jo vetëm për komunitetin e për këmbësorët, po edhe për ata që ulen nëpër tavolinat jashtë dhe marrin frymë lirisht, jo mbrapa xhamave, barrikadave e ferrave, çka e rrit patjetër edhe cilësinë e shërbimit.
Ndërkohë ka ende ngrehina që i rezistojnë më kot kërkesës për t’u shkulur vetë nga mexhelisi, se në fund të tëra do ikin po do ikin bashkë me një gjobë të kripur për ndërtuesin e pamirëkuptuar.
/vizionplus.tv
