Gjermania, Franca, Spanja dhe Portugalia janë ekipet më të mira të Ligës së Kombeve, të cilat kanë siguruar edhe një biletë për në fazën e Final Four të këtij turneu në muajin qershor.
Të gjitha ndeshjet e kthimit të çerekfinaleve ishin dramatike. Dueli legjendar mes Gjermanisë dhe Italisë prodhoi 6 gola për një barazim poetik 3 me 3, mirëpo Pancerat kaluan më tej pasi fituan ndeshjen e parë në San Siro 2 me 1.
Në Dortmund, të zotët e shtëpisë e asfaluat Italinë në pjesën e parë me lojë dhe gola, duke shënuar tre herë falë realizimeve të Kimmich, Musiala dhe Klostermann. Spikati gafa e lojtarëve të Italisë në golin e dytë shënuar nga Musiala pas ekzekutimit të një goditjeje nga këndi, teksa Azzurrët po merreshin me gjyqtarin. Në pjesën e dytë, rehatia e gjermanëve u shfrytëzua nga Italia, e cila ishte në prag të një mrekullie.
Ata shënuan dy herë deri në minutën e 69 me anë të Mosiës Ken. Më pas fituan një penallti e cila mund të kishte rihapur shumë shpejt ndeshjen, por gjyqtari Marsiniak e anulloi pasi shkoi ta shihte episodin në videomonitor, një vendim mjaft polemizues, në fakt. Në fund, Raspadori shënoi sërish me penallti, por goli nuk vlejti për ta çuar ndeshjen në shtesa.
Në shtesë dhe lot spektakël shkoi Spanjë-Holandë. Pas barazimit 2 me 2 në takimin e parë, 90 minutat e rregullt edhe në Spanjë përfunduan sërish 2 me 2. Oyarzabal shënoi dy herë për Iberikët, ndërsa Depay dhe Maten realizuan për Tulipanët. Ndeshja shkoi në shtesë, ku Jamal fillimisht shënoi për vendësit, ndërsa për ta çuar sfidën tek penalltitë mendoi Simons. Vendimtare tek 11-metroshat ishte gabimi i Malen, ndërsa Pedri shënoi penalltinë vendimtare për Spanjën.
Llotaria e penalltive u buzëqeshi edhe Francës, e cila, pasi ishte mundur 2 me 0 në Kroaci nga ballkanasit, fitoi ndeshjen e kthimit në kohë të rregullt 2 me 0 në fushën e vet falë realizimeve të Olize dhe Dembélé. Në shtesë nuk pati asnjë ndryshim, ndërsa tek penalltitë Stanisic gaboi për kroatët dhe Upamecano realizoi goditjen e fundit për Francën. Vendimtar me dy pritje tek Gjelat, portieri Mike Maignan.
Edhe Portugali-Danimarkë u desh të zgjidhej në shtesë. Nordikët kishin fituar 1 me 0 ndeshjen e parë në fushën e tyre, ndërsa Luzitanët fituan brenda kohës së rregullt 3 me 2 ndeshjen e kthimit në fushën e tyre falë një autogoli të Andersen, dhe golave të Ronaldos dhe Trinkaos. Në shtesë, gjithçka e lehtë për Portugalinë, e cila shënoi dy herë të tjera me Trinkaon dhe Ramos. /vizionplus.tv
