Nënkryetari i LSI, Petrit Vasili nuk ka besim tek drejtësia e re.
Diçka të tillë ai e deklaroi gjatë një interviste për emisionin “Quo Vadis” në “Vizion Plus”.
Vasili tha se nuk mund të kihet besim kur dosjet më të bujshme mbyllen apo nuk hetohen.
“Në rast se unë nuk shikoj që kjo drejtësi nuk ka marrë asnjë aksion, si do ta besoj unë këtë drejtësi? Kur shikoj që çojmë çështje dhe çështje mbyllen pafund, si mund të besoj unë te drejtësia e re kur për dosjen 184, i çon SPAK-u fleta e arrestit i shkon të vdekurve. Ti ke qeshur vet si gazetare, sepse nuk mundet që drejtësia e re, më perfekte, më solide, më serioze do të arrinte në këtë derexhe. Dhe 184 që tashmë i kanë gjithë mediat botërore përgjimet, që me kryeministër, me ministra, me drejtorë, me deputetë, nuk është asnjë prej tyre, por rastësisht fletë-arresti u vete të vdekurve. Ju, jo si gazetare, por si qytetare keni qeshur shumë kur fleta e arrestit i vete të vdekurit dhe ata që batërdisën votat, mbushën furgonët me horra, i çojnë atje dhe nuk dënohen. Ne jemi dy qytetarë dhe si të tillë presim ndaj krimeve të shohim veprimet përkatëse sesi shkojnë përpara drejtësisë. E para, unë nuk ngopem dot me deklarata, unë ngopem me veprime, prokurorët flasin me vendime, nuk flasin as me këshillime.”
