Ndoshta lejleku është shpendi që i mban më gjatë zogjtë e tij në fole. Kjo lidhet edhe me zhvillimin e ngadaltë të sqepit, këmbëve dhe krahëve të gjatë, të cilët zhvillohen gradualisht.
Zakonisht, lejlekët bëjnë 1–2 vezë në sezon dhe për foletë shfrytëzojnë majat e shtyllave me shesh. Të tilla janë edhe shtyllat dyshe prej betoni pranë Fshat-Maliqit, ku ndodhen dy fole, shumë pranë njëra-tjetrës.
Në rrugën nacionale Maliq–Lozhan, lejlekët kanë zgjedhur të ndërtojnë foletë e tyre edhe mbi shtyllat e tensionit të mesëm, duke krijuar një pamje të veçantë për këdo që udhëton në këtë aks.
Sigurisht, foletë janë të ekspozuara gjatë gjithë ditës ndaj diellit dhe temperaturave të larta, por duket se kjo nuk përbën ndonjë problem të madh për këta shpendë. Ushqimi i bollshëm me peshq dhe bretkosa në lumin Devoll dhe kanalet përreth u krijon atyre një burim të mirë ushqimi.
Siç mund të shihet edhe në keto pamje, pranë zogjve qëndron nëna, ndërsa mashkulli pozicionohet në shtyllën më të afërt, siç është vërejtur edhe në orët e vona të mbrëmjes.
Një pamje e bukur e natyrës, ku jeta e egër përshtatet mes peizazhit dhe infrastrukturës së krijuar nga njeriu.
/vizionplus.tv
