Leje ndërtimi false/ Gjykata e Beratit jep masën e sigurisë për ish-kreun e Bashkisë Kuçovë, Bardhyl Gjyzeli

Pas rreth 2-vitesh gjykim në Gjykatën e Rrethit Gjyqësor Berat, kjo e fundit ka caktuar masën e sigurisë “arrest me burg” për ish-kryetarin e bashkisë Kuçovë, Bardhyl Gjyzeli. Ish kreu i Bashkisë Kuçovë ishte nën hetim për  “Shpërdorim Detyre”, për një leje ndërtimi të dhënë ndaj një qytetari në mënyrë të jashtëligjshme.

Gjyqtarja Entela Gjoni ka dënuar me 1-vit burg ish kryebashkiakun e Kuçovës Bardhyl Gjyzeli, e konvertuar në 2-vjet “shërbim prove”. Së bashku me Gjyzelin, në burg është lënë dhe një tjetër punonjës në këtë institucion. Bëhet fjalë për ish inxhinierin e Bashkisë Kuçovë Gjergji Çërra, për të cilin u caktuan 2 vite burg të konvertuara në 4 vite shërbim prove.

Ndërkohë nën hetim ishte dhe qytetari që përfitoi lejen e ndërtimit, Arben Bilbili. Ky i fundit u dënua me 1 vit burg të konvertuar në 4 vite shërbim prove. Për shkak të parashkrimit të afateve të veprës penale, ka shpëtuar pa dënim vetëm ish-drejtori i Urbanistikës, Gentjan Islami.

Bardhyl Gjyzeli,kryetari socialist nën drejtimin e bashkisë së Kuçovës në vitet 2011-2015 u dërguar për gjykim për  veprën penale “Shpërdorim Detyre” në Gjykatën e Shkallës së Parë të Rrethit Berat në vitin 2020, së bashku me Drejtorin e Urbanistikës Gentjan Islami dhe inxhinierin urbanistik Gjergji Çërra.

Bashkë me ta në këtë dosje penale ishte edhe qytetari nga Kuçova, Arben Bilbili, i cili akuzohej për “Falsifikim Dokumentash” dhe “Deklarim të rremë para oficerit të policisë gjyqësore”.

Kallzimi penal ndaj kryebashkiakut Gjyzeli, ish zyrtarëve të bashkisë Kuçovë dhe ndaj shtetasit Arben Bilbili ka filluar në datë 17 shtator 2019, pas denoncimit të bërë në Prokurorinë e Rrethit të Beratit nga dy qytetarët e Kuçovës,nënë e bir, Merjeme dhe Ervin Bilbili.

Ata i akuzonin zyrtarët për dhënien e lejes së ndërtimit të një objekti dykatësh rreth 5-vite pasi ndërtimi kishte përfunduar.

Sipas hetimeve të kryera nga prokuroria,rezultoi se leja e ndërtimit ishte nxjerrë nga bashkia e Kuçovës pasi kishte përfunduar ndërtimi i objektit dhe se i gjithë dokumentacioni ku ata ishin bazuar për të nxjerrë këtë leje ishte i falsifikuar.