Papa Françesku u përcoll për në banesën e fundit. Ceremonia mortore nisi me ritet në Kapelën Sistine. Lutjet u mbajtën në latinisht, traditë e zakonshme për shërbimet kishtare të Vatikanit.
Trupi i pajetë i Atit të Shenjtë u mbajt mbi supe duke dalë nga Bazilika e Shën Pjetrit, ndërsa të pranishmit e shoqëruan me duartrokitje. Sakaq, mbi arkivolin prej druri të Papa Françeskut ishte vendosur Ungjilli i hapur.
10 mbretër dhe mbretëresha, 50 krerë shtetesh, delegacione nga 160 vende, rreth 4000 meshtarë, përfaqësues fetarë si dhe mbi 250 mijë besimtarë nga e gjithë bota ishin të pranishëm në ceremoni. Pjesëmarrës ishin edhe kreu i Shtëpisë së Bardhë Donald Trump, ish-presidenti amerikan Joe Biden, ai i Ukrainës Volodymir Zelensky, kreu i shtetit francez Emmanuel Macron, si dhe Princi William nga Britania e Madhe.
Dekani i Kolegjit të Kardinalëve, Giovanni Battista Re, përshkroi jetën e Papës së ndjerë si një rrugëtim të përkushtuar ndaj të tjerëve, “deri në ditën e fundit të jetës së tij tokësore.”
“Imazhi i fundit që kemi për të, i cili do të mbetet i skalitur në kujtesën tonë, është ai i të dielës së kaluar, të dielën e Pashkëve, kur Papa Françesku, megjithë problemet e tij të rënda shëndetësore, donte të na bekonte nga ballkoni i Bazilikës së Shën Pjetrit. Me lutjet tona, ne tani ia besojmë shpirtin e Papës sonë të dashur Zotit, që t’i japë atij lumturi të përjetshme në vështrimin e ndritshëm dhe të lavdishëm të dashurisë së Tij të pamasë.”
Pas përfundimit të meshës mortore në Vatikan, trupi i Papa Françeskut u nis me një automjet drejt Kishës Santa Maria Maggiore në Romë për ceremoninë e varrimit. Procesioni, që përshkoi një itinerar prej 6 kilometrash nga Sheshi i Shën Pjetrit, kaloi përmes qendrës historike të Romës, pranë Koloseut dhe Piazza Venezia, përpara se të mbërrinte në kishën ku Ati i Shenjtë do të prehet përgjithmonë. Mijëra qytetarë, të rreshtuar përgjatë rrugës, e përcollën Papën, duke i dhënë lamtumirën e fundit një prej figurave më të dashura të Kishës Katolike. Ceremonia e varrimit në Santa Maria Maggiore nuk ishte e hapur për publikun, në përputhje me amanetin e vetë Papës, megjithatë turma të mëdha ishin mbledhur jashtë kishës për të bërë homazhet e fundit. Papa Françesku është Papa i parë pas një shekulli që varroset jashtë territorit të Vatikanit.
