I dërguari i Bashkimit Evropian për dialogun, Miroslav Lajçak, zhvilloi të mërkurën një tjetër takim me kryeministrin Albin Kurti në Prishtinë, në kuadër të intensifikimit të dialogut mes Kosovës dhe Serbisë, për arritjen e një marrëveshjeje mes dy vendeve.
“U ktheva sot në Kosovë për të vazhduar diskutimet e mia të sinqerta, të hapura dhe intensive me kryeministrin Albin Kurti dhe zëvendëskryeministrin Besnik Bislimi për hapat e ardhshëm dhe rrugën përpara për normalizimin e marrëdhënieve me Serbinë. Ne gjithashtu ramë dakord që të gjitha marrëveshjet e kaluara të dialogut duhet të zbatohen plotësisht.”
Departamenti Amerikan i Shtetit nga ana e tij bëri thirrje për përshpejtimin e punës nga pala kosovare për themelimin e bashkësisë së komunave serbe.
“Ne kërkojmë nga palët që të përmbushin përgjegjësitë e tyre. Si Kosova ashtu edhe Serbia duhet të zbatojnë marrëveshjet, të cilat tashmë i kanë nënshkruar përmes procesit të dialogut duke përfshirë formimin e Asociacionit të Komunave me shumicë serbe.”
Zëdhënësi i departamentit, Ned Price, theksoi gjithashtu rëndësinë e kthimit të serbëve në institucionet e Kosovës.
