Singapori, shtet në juglindje të Azisë, propozon një model të ri të përballjes me Covid-19, i cili i jep fund paralizimit të jetës shoqërore dhe ekonomike.
Plani i tre ministrave të qeverisë, anëtarë të task forcës, parashikon që t’i jepet fund praktikës së testimit dhe izolimit të çdo personi me simptoma të Covid-19, madje rastet ditore nuk do të numërohen më. Kufijtë do të jenë të hapur dhe nuk do të ketë më karantinë, maska apo gjurmim kontaktesh. Sipas kësaj strategjie, njerëzit do të lejohen të grumbullohen dhe të udhëtojnë si zakonisht.
Autoritetet në Singapor planifikojnë të monitorojnë vetëm pacientët që shfaqin simptoma të rënda dhe shtrohen në kujdes intensiv. Ata besojnë se procesi i vaksinimit do të ndihmojë në rritjen e imunitetit të qytetarëve. Në këtë mënyrë edhe sistemi shëndetësor nuk do të mbingarkohet.
Modeli i ri ka në qendër idenë se shoqëria duhet të mësohet të jetojë me virusin, ashtu siç ka mësuar të bashkëjetojë me sëmundje të tjera më herët. Vizioni i ekspertëve synon ta kthejë pandeminë e Covid-19 në një gjë më pak të rrezikshme, si gripi apo fruthi.
Rruga e propozuar nga Singapori për të dalë nga ngërçi i pandemisë globale mund të shërbejë si model veprimi për shtetet e tjera, të cilat po përballen me protestat qytetare kundër kufizimeve dhe me pasojat e rënda të bllokimit në ekonomi, arsim e sektorë të tjerë.
