Kryetari i Kuvendit të Kosovës, Glauk Konjufca, u ka ndaluar hyrjen në parlament deputetëve të Listës Serbe.
Kjo për shkak se ligjvënësit e partisë serbe paraqiten në Kuvend vetëm një herë në gjashtë muaj, me qëllim ruajtjen e mandatit dhe përfitimin e pagës. Deputetët serbë gjithashtu nuk janë distancuar nga veprimet terroriste në komunat me shumicë serbe në veri.
“Ju drejtohem deputetëve të Listës Serbe që vijnë e provokojnë në këtë mënyrë. Është e patolerueshme që në Kuvend të ketë sjellje të tilla, ku një herë në gjashtë muaj vini dhe keqpërdorni paratë e taksapaguesve. Në anën tjetër, e luftoni Kosovën me çdo mjet që keni. Shkoni e rrini gatitu te shefi juaj kriminel [Milan] Radoiçiq. E keni guximin të vini në Kuvendin e Kosovës. Turp të keni! Ndërpritet kjo seancë, dhe kërkoj që ta lironi këtë sallë,” tha Konjufca.
Pas kësaj, Konjufca ndërpreu seancën plenare të kësaj të enjteje. Deputetët e Listës Serbe, të cilët gëzojnë mbështetjen e Beogradit, janë tërhequr nga pjesëmarrja në seancat plenare që nga viti 2022, në të njëjtën kohë kur u tërhoqën nga institucionet në veri të gjithë punonjësit serbë. /vizionplus.tv
