Kuvendi i Kosovës do të zhvillojë sot në orën 10:00 një seancë vendimtare me një pikë të vetme në rend dite zgjedhjen e qeverisë së re. Kryeministri në detyrë dhe mandatar për formimin e ekzekutivit, Albin Kurti, pritet të paraqesë para deputetëve përbërjen e kabinetit të tij qeveritar. Seanca do të tregojë nëse Kurti do të arrijë të sigurojë 61 votat e nevojshme për krijimin e Qeverisë.
Nëse dështon të marrë mbështetjen e shumicës, Kurti do të bëhet mandatari i parë që nuk arrin të formojë qeverinë në përpjekjen e parë, ndryshe nga të gjitha rastet e mëparshme kur mandatarët kanë marrë votëbesimin e Kuvendit menjëherë.
Presidentja Vjosa Osmani ka bërë të ditur se, nëse sot nuk arrihet marrëveshje, ajo do të thërrasë të gjitha partitë për konsultime, për të parë nëse ndonjëra prej tyre mund të sigurojë shumicën e kërkuar parlamentare. Osmani ia kishte dhënë Kurtit mandatin pas fitores së Lëvizjes Vetëvendosje në zgjedhjet e 9 shkurtit.
Megjithatë, deri më tani nuk është arritur asnjë koalicion. PDK, LDK dhe AAK kanë përjashtuar bashkëpunimin me Vetëvendosjen, ndërsa NISMA ka lënë të hapur mundësinë e një marrëveshjeje, por me kushte specifike që lidhen me postin e kryetarit të Kuvendit.
Në fillim të javës, Kurti sinjalizoi se mund të mos jetë në gjendje ta formojë qeverinë, duke përmendur si alternativë shkuarjen në zgjedhje të reja. Sipas Kushtetutës së Kosovës, nëse mandatarit të parë nuk i del votëbesimi, presidentja ka 10 ditë kohë për të caktuar një kandidat tjetër që ka më shumë gjasa për të formuar qeverinë. Në rast se dështon edhe mandati i dytë, shpallen zgjedhje të reja, të cilat duhet të mbahen brenda 40 ditësh nga dita e thirrjes.
/vizionplus.tv
