Nga Blerina Cene
Gjykata Kushtetuese shqyrtoi sot prej orës 10:00 të mëngjesit deri në 15:00, ligjshmërinë e përgjimeve, mesazheve dhe të gjitha të dhënave të dala nga aplikacioni i dikur i koduar e sot i thyer, “SKY ECC”.
Vendimi pritet të mertret brenda 30 ditësh sipas afatit ligjor të Gjykatës Kushtetuese.
Ishte biznesmeni i arrestuar prej kësaj platforme, Pëllumb Gjoka, ai që kërkoi i kërkoi Gjykatës Kushtetuese që komunikimet në këtë platformë të mos përdoren si fakte penale nga prokuroria e posaçme. Vetë i pandehuri, Pëllumb Gjoka është vënë nën akuzë për vepra shumë të rënda penale, nga operacioni Metamorfoza, për vrasje me paramendim në kuadër të organizatës kriminale, të zbuluara këto pas dekodimit të aplikacionit nga agjencitë e huaja ligjzbatuese.
Nga komunikimet në SKY ECC, SPAK ka vënë në bankën e të akuzuarve një numër të lartë personash të dyshimtë, të përfshirë në ngjarje të rënda kriminale.
Aplikacioni shërbeu për të lidhur aktivitetin e paligjshëm të kriminelëve, biznesmenëve e politikanëve duke goditur nëntë grupe kriminale.
Një prej ligjvënësve të parlamentit shqiptar ra në duart e drejtësisë pikërisht për shkak të shfrytëzimit të aplikacionit në funksion të krimit të organizuar. Fjala është për ish- deputetin, Jurgis Çyrbja që sinjalizonte e strehonte persona me të shkuar të errët kriminale në këmbim të votës.
Ky aplikacion i ka rrënjët në Kanada, ndërsa pas sekuestrimit të serverit, autoritetet e huaja kanë konstatuar se ndër gjuhët më të përdorura në biseda është shqipja. Gjykata e Strasburgut, pak javë më parë i konsideroi të ligjshme komunikimet në aplikacionin tjetër, ENCHROCHAT. Megjithatë, fjala e fundit i takon Gjykatës Kushtetuese. E sigurt është që nëse Kushtetuesja i shpall përgjimet të paligjshme, atëherë hetimet e SPAK të iniciuara nga SKY ECC, bien.
