Edhe pse i pati shpresat te Gjykata Kushtetuese, kjo e fundit ka fundosur Arben Frrokun duke lënë në fuqi dënimin me burgim të përjetshëm, në lidhje me vrasjen e kryekomisar Dritan Lamaj, ngjarje e ndodhur në vitin 2013.
Kujtojmë se Gjykata Europiane për të Drejtat e Njeriut kishte vendosur që të rihapet dosja e Arben Frrokut, pasi vlerësoi se procesi ndaj tij ka pasur shkelje të të drejtave të njeriut dhe duhet të rigjykohet nga Gjykata Kushtetuese e Shqipërisë.
Në këto kushte Kushtetuesja shqyrtoi pretendimet e Frrokut për rrëzim të vendimit të Apelit dhe Gjykatës Së lartë, që e kishin dënuar me burgim të përjetshëm. Përfundimisht u vendos rrëzimi i kërkesave dhe u lanë neë fuqi vendimet, duke konfirmuar dënimin me burgim të përjetshëm.
Arben Frroku fillimisht u shpall i pafajshëm nga Shkalla e Parë e ish-Gjykatës për Krime të Rënda, por më pas Apeli e dënoi. Pasi u arratis ai u arrestua në 2015-ën në Holandë, vend në të cilin vijon të vuajë dënimin me burgim të përjetshëm të dhënë nga drejtësia shqiptare.
