Kryeministri Edi Rama nuk kurseu talljet ndaj figurave që PD ka vendosur të fusë në listë për zgjedhjet e 25 prillit.
Duke theksuar se pjesë e ekipit janë vetëm emra të vjetër, kreu i qeverisë tha se askush nuk del më të votojë për ta. Për Edi Ramën, Shqipëria nuk fiton me këtë skuadër.
“Nuk e di kush është ai qytetar që në Tiranë do të dalë nga shtëpia për të votuar një skuadër ku kapiteni është Sali Berisha dhe janë në radhë fosilet e Shqipërisë, Fatmir Mediu, Shpëtim Idrizi, Vangjel Dule dhe natyrisht Mesila Doda. Me këto emra që thash mbaroi gjysma e skuadrës. Është e pabesueshme. Kjo ishte një skuadër të mbajtur bashkë lojtarët në fushë që njëri të mos dehet në stol, tjetri të mos vjedhë tutat e të tjerëve në stol, tjetri të mos marrë stolin në shtëpi. Kjo është alternativa për Shqipërinë? Me këtë fiton Shqipëria? Me Fatmir Mediun fiton Shqipëria? Shpëtim Idrizi, sekseri i Çamërisë që zgjohet nga gjumi në orën 2 dhe del në televizor i buhavitur dhe i hap luftë Greqisë? Vangjel Dulja në Tiranë? Çfarë do Vangjel Dulja në Tiranë apo se nuk e voton më asnjë minoritet? Mesilën e kuptoj, janë futur se do më lidhin mua me zinxhirë. Është katastrofë. Jam shumë i keqardhur dhe i zhgënjyer. Qytetarët e Tiranës kanë mundësinë të zgjedhin mes dy pensionistëve, Luljeta Bozon dhe Sali Berishën. Edhe Luli aty në krye të listës, se dhëndri vjen gjithmonë në ballë dhe pastaj krushqia i shkon nga mbrapa. Pastaj krushqia tjetër, SPAK dhe OFL dhe do të martohen bashkë këta në 25 prill. Katastrofë!”
