Pika kufitare mes Kosovës dhe Serbisë në Jarinjë është hapur sot plotësisht për qarkullimin e mjeteve, pothuajse një muaj nga mbyllja. Në të njëjtën kohë, kryeministri Albin Kurti ka zhvilluar një takim me komandantin e sapo emëruar të KFOR, Ozkan Ultutas , të cilit i ka kërkuat të shtohet siguria në veri.
ZYRA E KRYEMINISTRIT TE KOSOVES
“Sasia e madhe e armatimit dhe municionit ushtarak të konfiskuar është prodhuar në Serbi. Edhe ushtrimet luftarake të paramilitarëve që kryen terror e vrasje në Banjskë të Zveçanit janë kryer në Serbi. Atje Kosova nuk ka juridiksion prandaj nevojitet edhe një hetim ndërkombëtar në Serbi mbi përgatitjet, furnizimin dhe orkestrimin e këtij sulmi”.
Po ashtu Kurti theksoi se është i interesuar për bashkëpunim të fortë, takime të shpeshta dhe komunikim të rregullt me Komandantin e KFOR-it.
Pikëkalimi kufitar në Jarinjë, por edhe ai në Bërnjak në veri u mbyllën nga autoritetet e Kosovës më 24 shtator, pas sulmit të armatosur ndaj policisë, ku mbeti i vrarë efektivi Afrim Bunjaku.
Shtetet e Bashkuara dhe Bashkimi Evropian kanë dënuar ashpër sulmin, ndërkaq Kosova përmes një rezolute të miratuar në Kuvend ka kërkuar hetim ndërkombëtar për Serbinë lidhur me sulmin në Banjskë.
