Me rritjen e temperaturave dhe ardhjen e ditëve më të nxehta të verës, shumë prej nesh i drejtohen kondicionerëve për të krijuar një ambient më të freskët dhe të rehatshëm brenda shtëpisë apo zyrës. Por shpesh lind pyetja: cila është temperatura ideale që të ndiheni mirë, të kurseni energji dhe të mos rrezikoni shëndetin?
Sipas ekspertëve të klimës dhe shëndetit, temperatura optimale për kondicionerin gjatë ditëve të nxehta është rreth 24-26°C gjatë ditës dhe rreth 25-27°C gjatë natës.
Kjo temperaturë ndihmon trupin të përshtatet gradualisht me ambientin, shmang goditjen termike dhe mbron nga ndryshimet e befta të temperaturës që mund të ndikojnë në sistemin respirator apo të shkaktojnë dhimbje koke dhe lodhje.
Një tjetër arsye për të mbajtur një temperaturë të moderuar është kursimi i energjisë elektrike. Sa më i ulët të jetë temperatura e vendosur në kondicioner, aq më shumë punon pajisja dhe aq më i lartë bëhet fatura mujore. Një ndryshim prej vetëm një grade mund të sjellë deri në 5-7% më shumë konsum energjie.
Gjithashtu, është e rëndësishme të mos qëndroni direkt përballë rrymës së ftohtë të ajrit dhe të kontrolloni rregullisht filtrat e kondicionerit për të shmangur shpërndarjen e mikrobeve apo alergeneve në ajër.
Për një verë më të shëndetshme dhe më të freskët, mos e teproni me ftohjen. Ndonjëherë, freskia e tepërt mund të bëhet po aq e dëmshme sa nxehtësia, gjithçka ka të bëjë me balancën. Dhe mos harroni të pini ujë, të vishni rroba të lehta dhe të qëndroni në ambiente të ajrosura mirë.
/vizionplus.tv
