Ashtu si intervistat me kryeministrin Rama dhe kreun e PD, Basha, Rai News ka intervistuar edhe kryetaren e LSI.
Monika Kryemadhi konfirmoi për median italiane se protestat do të vijojnë.
Monika Kryemadhi: Institucionet janë totalisht të shkatërruara dhe është normale që ai të ndihet paksa si mbreti i Shqipërisë, duke menduar se ka mbështetjen e të gjitha institucioneve, por ky është një problem. Sjellja e tij është vërtetë një problem serioz, nëse ai nuk arrin të kuptojë se çfarë po ndodh, është problem i tij dhe jo problem i popullit shqiptar apo opozitës. Protesta jonë do të vazhdojë. E gjithë axhenda jonë varet nga qeveria, nga vendimi i mazhorancës dhe populli do të jetë me ne, sepse ne jemi opozita, ne do ti mbrojmë dhe nuk do ti lëmë të provokohen nga forca të tjera, si forcat e sigurisë të qeverisë. Axhenda e opozitës është shumë mirë e organizuar dhe kjo axhendë do të shkojë para për ta kthyer Shqipërinë në rrugën e duhur, në një vend demokratik që synon të anëtarësohet në Europë përmes demokracisë.
Ndërkohë Kryeministri Edi Rama në një intervistë për gazetën “La Republica” theksoi se protesta e 16 shkurtit nuk ishte protestë e njerëzve, e sindikatave apo e studentëve.
Sipas tij djegia e mandateve nuk është diçka e mirë për demokracinë dhe sjellja e opozitës nuk i shërben integrimit në Bashkimin Evropian.
