Monika Kryemadhi i ka bërë thirrje anëtarëve të Lëvizjes Socialiste për Integrim që të zgjohen nga gjumi dhe t’u tregojnë njerëzve rolin që partia e saj ka pasur gjatë viteve të qeverisjes.
Në fjalën e mbajtur në Komitetin Drejtues Kombëtar, Kryemadhi theksoi se gjatë qeverisjes LSI nuk e ka lejuar PS që të vendosë gjoba ndaj biznesit dhe se ka ndaluar korrupsionin.
Sipas Kryemadhit, ka ardhur koha që të gjithë njerëzit të njihen me këtë fakt dhe të mos bien pre e propagandës së qeverisë.
“Njerëzit e LSI duhet të zgjohen nga gjumi, jo duke ndejur me njëri-tjetrin, se unë nuk kam nevojë të bind Erisa Xhixhon, as Nora Malaj, dhe as Panaritin, duhet të takojmë njerëzit që kanë qenë viktima të makinerisë së propagandës së Edi Ramës, të cilët nuk e dinë se çfarë ka bërë LSI-ja, rolin e LSI në 8 vitet e qeverisjes së saj. Ka qenë vendimtar angazhimi i LSI. Ka qenë vendimtar roli i LSI për frenimin e korrupsionit në radhët e qeverisjes së Partisë Socialiste, për gjobat dhe tmerret e që ka bërë rilindja ndaj biznesit, ka qenë vendimtar roli i LSI për lirinë e medias. Mjafton të lexoni raportet në 2 vite të qeverisjes që rilindjes dhe Edi Ramës, e keni me 9 vende të rënë për korrupsion, 11 vende për lirinë e medias, 7 vende për lirinë e ekonomisë. Nuk po flasim më krimin e organizuar dhe angazhimin dhe korrupsionin e strukturave të organizuara korruptive, grabitëse të pronave të shqiptarëve. Shteti shqiptar nuk është pronë e Edi Ramës dhe Rilindjes por i shqiptarëve.”
