Subscribe

Në seancën vendimtare për kalimin apo jo për gjyq të dosjes së inceneratorit të Fierit, ish-Ministri i Mjedisit, Lefter Koka, shpërtheu në akuza ndaj Monika Kryemadhit, e cila ka kryer kallëzimet në SPAK.

 

Ai e konsideroi arrestimin e tij absurd, duke thënë se i ka shërbyer shtetit me përkushtim.

 

LEFTER KOKA
ISH- MINISTËR I MJEDISIT

“Si mundet një prokurori të marrë për bazë kallëzimin e një të çmendure, si Monika Kryemadhi dhe t’i mjaftojë për të arrestuar qytetarë të pafajshëm? Unë i kam shërbyer këtij vendi me besnikëri dhe në përputhje me ligjin. Mirë unë që u dogja dhe do dënohem, po gjykata duhet të qëndrojë me dinjitet dhe të mos dënojë njerëz të tjerë të pafajshëm.”

 

Pas deklaratës, ish-ministri mësohet se ka shfaqur probleme shëndetësore dhe është larguar nga salla e gjyqit.

 

Ndërkohë, gjyqtarja e posaçme, Flojera Davidhi rrëzoi kërkesën për bashkimin e dy procedimeve penale në një të vetëm, sikundër më herët edhe gjyqtarja e djegësit të Elbasanit vendosi që çështjet të gjykohen të ndara.

 

Seanca maratonë ka nisur në orën 9 të mëngjesit dhe po vijon ende.

 

Po ashtu brenda dyerve të gjykatës, po japin pretendimet e tyre edhe avokatët e 19 të pandehurve të tjerë, përfshirë këtu edhe ish-deputetin socialist, Alqi Bllako. Për inceneratorin e Fierit, gjykata ka marrë 20 të pandehur dhe 14 kompani.

 

Ndërsa, ditën e djeshme seanca për kalimin apo jo për gjyq të inceneratorit të Elbasanit u shty për në datën 21 shkurt. Për këtë djegës, gjykata ka marrë 10 të pandehur dhe ka sekuestruar dy shoqëri.

 

Leave a Reply

Your email address will not be published. Required fields are marked *