Seanca në Këshillin e sigurimit të OKB-së për bashkëpunimin mes vendeve përmes mbrojtjes së parimeve të kartës së OKB, e drejtuar nga ministri i jashtëm i Rusisë, Sergey Lavrov, shkaktoi përplasje verbale, të fokusuara në luftën ruse në Ukrainë.
Diplomati rus shfrytëzoi afro 25 minuta për të folur për një seri çështjesh. Lavrov insistoi se Kremlini po lufton nazistët në Ukrainë, NATO është një kërcënim për Rusinë dhe sanksionet e perëndimit ndaj Rusisë janë të paligjshme.
Sipas tij, Perëndimi kurrë nuk synonte të zbatonte Marrëveshjet e Minskut, por vetëm donte të fitonte kohë për të armatosur Ukrainën.
Mandje, ai akuzoi në mënyrë të drejtpërdrejte, Shtetet e Bashkuara se donin të shfrytëzonin një regjim haptazi racist.
SERGEY LAVROV
MINISTËR I JASHTËM I RUSISË
“Është e qartë për të gjithë, edhe pse jo të gjithë flasin për këtë, se kjo nuk ka të bëjë fare me Ukrainën. Kjo ka të bëjë me mënyrën sesi marrëdhëniet ndërkombëtare do të vazhdojnë të formësohen përmes vendosjes së një konsensusi të shëndoshë mbi bazën e ekuilibrit të interesave ose përmes avancimit agresiv dhe të paqëndrueshëm të hegjemonisë së Uashingtonit”
Këto deklarata u kundërshtuan nga pjesëtarët e tjerë të këshillit. Sekretari i Përgjithshëm Antonio Guterres ndërsa shefi i OKB-së dënoi luftën e Rusise në Ukrainë.
“Sulmi ndaj Ukrainës është në kundërshtim me Kartën e Kombeve të Bashkuara dhe ligjin ndërkombëtar, po shkakton vuajtje dhe shkatërrime masive për vendin dhe popullin e tij”
Ambasadorja amerikane në OKB, Linda Thomas-Greenfield, deklaroi se Rusia ka shkelur në mënyrë të përsëritur të drejtat universale të njeriut dhe liritë themelore, brenda dhe jashtë vendit.
Edhe Shqipëria dënoi agresionin rus.
FERIT HOXHA
AMBASADORI SHQIPËRISË NË OKB
“Shkatërrimi i zonave të banuara, vrasja e qytetarëve, rrafshimi i shkollave apo spitaleve e infrastrukturës civile, janë mjete që Moska i ka përdorur për të përulur një popull të tërë dhe tashmë, e njëjta Rusi, vjen me “leksione mbi raportet miqësore që vendet duhet të kenë”.
Ambasadori shqiptar kritikoi Kremlinin se po tenton të justifikoje veprimet e paligjshme në Gjeorgji në vitin 2008 dhe në Ukrainë që nga viti 2014, duke nxjerrë si shembull Kosovën.
