Në “Foltoren” e ngritur në Peshkopi, para dhjetëra demokratëve, ish-kryeministri Sali Berisha nuk hezitoi të sulmonte Edi Ramën, duke e paralajmëruar se do të përballet me demokratët për të gjitha vendimet që ka marrë në “kurriz të shqiptarëve”.
“Ato daulle nuk janë dasme por beteje dhe vetëm beteje, do përballesh me demokratët për të gjitha këto që ke bërë. PD është sot e goditur rënë nga aktet e papërgjegjshme nga udhëheqja pothuaj inegzistente e saj. Më datën 25 prill, sondazhet tregonin se 19% e votuesve kishin votuar për kryetarit. Pra ne kishim shkuar tek kutit e votimit me sy të mbyllur. Mirënjohës që na votuan se ne drejtues nuk kishim. Unë shfrytëzoj rastin t’ju kërkoj ndjes sepse gjatë këtyre viteve nuk kam ngritur para jush problemet e mëdha që përballej PD, pavarësisht se ato unë ia kam thënë kryetarit të saj. Dhe në vitin 2017 i kërkova dorëheqjen, ndofta duhej të vendosja të rikthehesha për të mos patur Edi Ramën siç e kemi sot.”
Berisha u ndal edhe te kriza energjetike. Sipas tij, qeveria blen tani energji në bursën ndërkombëtare me një çmim shumë herë më të lartë, ndërkohë që pak muaj më parë e shiste energjinë e prodhuar në vend, me një çmim të ulët.
“Ky regjim, në këto 8 vite jo vetëm që nuk përparoi standartet e demokracisë dhe nivelin e jetesës së shqiptarëve, por çbëri një shumicë të madhe prej tyre dhe shqiptarët, realisht, i zhyti në varfëri dhe mjerim sot. Ai që quhet varfëri e skajshme, është 3.6 herë më e madhe se çishte në vitin 2013. Sot shqiptarët nga kombi me rrogën mesatare më të lartë në rajon, marrin rroga 30% më të ulta se në Kosovë. Kafshata e bukës është 87 herë, po ti mesatarizojmë se në vendet e BE-së. Ndërkohë që konsumi i saj është më i larti në Europë. Sot shqiptarët paguajnë naftën të barabartë me qytetarët e Zvicrës që kanë një rrogë mesatare 6000 euro në muaj. Litra e naftës është 1.41 cent në Zvicër dhe pak a shumë ky është çmimi në Shqipëri. Kjo sepse qeveria në vend që të mendojë për qytetarët, Edi Rama mendon për veten. Në vitin 2013 nafta nuk ishte e lirë, por nëqoftëse nafta ishte dyfishi i çmimit të saj në bursë, sot është 3.2 herë më e lartë se çmimi i saj në bursë. Kjo për shkak të qëndrimit të papërgjegjshëm të Ramës. Vjedhja monstruoze në të gjitha fushat ka bërë që arka e shtetit të jetë bosh. Qeveria detyrohet të dalë në treg për të marrë 700 mln euro borxh ndërkohë që na thotë se rritja ekonomike ishte 18%.”
