Ish-kryetari i Kuvendit të Kosovës, Jakup Krasniqi doli u ul këtë të hënë në bankën e të akuzuarve në Gjykatën e Hagës. Ai mohoi akuzat që janë ngritur për të, duke theksuar se nuk ka keqtrajtuar asnjë njeri. Me Serbinë, nënvizoi ai, lufta ka qenë politikisht.
“Unë jam arrestuar me 4 nëntor 2020 në aktakuzë, po na quani ndërmarrje kriminale të përbashkët, kurrë në jetën time në asnjë rast të vetëm nuk i ka trajtuar njerëzit as kaq sa më trajtuar mua nga ndërtesa e burgut deri në këtë ndërtesë, kurrë nuk i kam trajtuar njerëzit në këtë mënyrë. Prandaj, unë jam intelektual, jam njeri që e kam luftuar politikisht Serbinë, dhe s’e kam drejtuar gishtin nga popullsia serbe. Në aktakuzë i ndani shqiptarët katolikë dhe mysmiman, unë jam shqiptar dhe për mua është fyese. Cilësimi i Prokurorit se jemi ndërrmarje kriminale e përbashkët, për mua, shokët, familjet që luftuam gjatë për kombin tonë nuk ka gjë me fyese sepse ne në një kohë të gjatë, në rrethana të vështira jetë a vdekje u vumë në shërbim të lirisë, që e arritëm me SHBA e BE, me NATO e OKB dhe të gjithë ishim dhe jemi ndërrmarje e përbashkët Clirimitare dhe shtetformuese, ndërsa kriminal janë jo vetëm serb në Serbi, ka qenë vetëm koka e saj në Beograd dhe mbështetësit e politikave të Beogradit.”
Krasniqit në fillim të seancës i është lexuar aktakuza me 10 pika si i dyshuar për krime lufte dhe krime kundër njerëzimit.
- Përndjekje, krim kundër njerëzimit
- Burgosje, krim kundër njerëzimit
- Ndalim arbitrar, krim lufte
- Akte tjera çnjerëzore, krim kundër njerëzimit
- Trajtim mizor, krim lufte
- Torturë, krim kundër njerëzimit
- Torturë si krim lufte
- Vrasje, krim kundër njerëzimit
- Vrasje e paligjshme si krim lufte
- Zhdukje me forcë e personave, krim kundër njerëzimit.
Sipas aktakuzës, këto krime u kryen midis prillit 1998 dhe gushtit 1999 në Kosovë dhe në Shqipërinë Veriore.
