Drejtori i Drejtorisë për Kufirin dhe Migracionin Korçë, Drejtues Gëzim Zhupaj, priti në një takim zyrtar një delegacion të Policisë së Armenisë, në kuadër të shkëmbimit të eksperiencave dhe forcimit të bashkëpunimit ndërmjet dy vendeve.
Gjatë takimit, delegacioni armen u njoh nga afër me procedurat e punës së Policisë Kufitare shqiptare, mekanizmat e kontrolleve dytësore në pikat kufitare me fluks të lartë përpunimi dhe mënyrën e shkëmbimit të informacioneve jokofidenciale midis strukturave të Policisë së Shtetit dhe homologëve të vendeve kufitare.
Në këtë takim morën pjesë Zv.Drejtori i DVKM Korçë, shefat e sektorëve dhe të stacioneve të Policisë Kufitare në qarkun Korçë. Delegacioni armen përfshinte drejtues të lartë të Gardës Kufitare të Shërbimit Kombëtar të Sigurisë, përfaqësues të Departamentit të Trajnimeve dhe të Qendrës Arsimore dhe Shkencore, si dhe koordinatorë të projektit IOM Armenia dhe IOM Shqipëri.
Të dyja palët theksuan rëndësinë e shkëmbimit të eksperiencave dhe forcimit të bashkëpunimit për çështjet e sigurisë kufitare.
Vizitat e delegacionit armen në pikat e kalimit kufitar Kapshticë dhe Qafë Thanë shërbyen për të parë nga afër bashkëpunimin e Policisë Kufitare shqiptare me homologët grekë dhe maqedonas, duke lënë një impakt pozitiv tek përfaqësuesit armenë.
