Korça si qytet dhe rajoni juglindor janë përfshirë nga reshje dëbore me intesitet të lartë në orët e mbrëmjes të ditës së mërkurë. Vazhdimi i reshjeve gjatë natës, do të rëndojë gjendjen e rrugëve, të cilat gjatë këtyre ditëve të fundit janë paraqitur me probleme.
Problematikat e para me bllokimin e akseve të ndryshme janë shfaqur pasdite në rrugën Korçë-Dardhë, e bllokuar në dy pjesë të saj nga trashësia e madhe e dëborës. Me intensitetin e lartë të reshjeve, pritet që trashësia e dëborës të kalojë 70 centimetra në zonat e larta malore.
Kjo do të vështirësojë edhe më tej qarkullimin dhe lidhjen e fshatrave të thella me qëndrat administrative. Edhe para këtyre reshjeve të dendura të dëborës, ka patur probleme në proçesin mësimor, furnizimin me energji elektrike apo izolimin e disa zonave dhe fshatrave.
Gjatë ditës së enjte, mund të mësohet mbi situatën e krijuar, frekuentimin e shkollave, ndërprerjet e energjisë elektrike që raportohen për fidra të veçantë fshatrash e sidomos bllokimin e rrugëve.
Korça dhe rajoni i saj prej vitesh nuk kanë përjetuar një dimër kaq të ashpër si me reshje të vazhdueshme dëbore edhe temperatura mjaft të ulta.
Falë gadishmërisë dhe ndërhyrjes së institucioneve shtetërore e strukturave përgjegjëse për këto situata nuk janë regjistruar ngjarje dhe emergjenca tronditëse në rajonin e Korçës.
Drejtoria e Mbeshtetjes Rajonale ne Korce (pjese e strukturave te FA) u angazhua mbrëmjen e së mërkurës për disa orë në një operacion per zhbllokimin e aksit rrugor Korce -Voskopoje përmes personelit dhe borëpastrueses.
