“Klajdi më vdiq në duar”, nis kështu rrëfimi i vëllait të Klajdi Bitrit, 23-vjeçarit shqiptar që u vra pasditen e së dielës në Sirolo në Itali, nga një shtetas algjerian. Xhuliano e përshkruan të vëllain si një person altruist, cilësi e cila rezultoi fatale për të. Ai tregon se në momentin që i vëllai pikasi konfliktin mes shokut të tij dhe autorit të krimit, ndërhyri për të shuar gjakrat, por shtetasi algjerian ndonëse dukej i qetë u drejtua drejt automjetit dhe rrufeshëm mori shtizën duke shigjetuar Klajdin.
Teksa rrëfën këtë episod të pashlyeshëm në memorien e tij, Xhuliano ka vetëm një kërkesë.
“Ne duam drejtësi, do të organizojmë një demonstratë! E pashë vëllain të vdiste para meje, të vrarë me indiferencë totale, pa e kuptuar as pse. Pa pasur kohë për të vënë re se ai po vdiste. E pashë të zbehej gjithnjë e më shumë, krejt papritur, dhe nuk më përgjigjej më sepse kishte vdekur. I vrarë”, rrëfen ai.
Xhuliano tregon se prindërit janë ende në Shqipëri dhe me procedurat ligjore për të sjellë trupin e vëllait të prehet në atdhe, duhet të merret vetë ai.
“Ishim në dy makina – kujton Xhuliano i shtangur nga emocioni,- ‘Unë isha me vëllain tim dhe një person tjetër, ndërsa në tjetrin ishte një miku ynë italian me gruan dhe dy fëmijët e tij të vegjël. Së bashku, duhej të shkonim në det në Sirolo. Ishim pak mbrapa dhe, kur mbërritëm, pamë Danilon (miku italian) duke u rrahur nga algjeriani në mes të rrugës. Vëllai im kishte shumë respekt për Danilon, pasi ai e mori për të punuar tek ai, në kuzhinën e restorantit të tij dhe vëllai im mundi të kursente para e të më merrte dhe mua me vete këtu në Itali. Prindërit tanë janë ende në Shqipëri. Ata nuk do të mund të vijnë as në Itali për të parë djalin e tyre. Tani, jam unë që ndihem i detyruar të zgjidh të gjitha dokumentet e nevojshme për ta sjellë atë në shtëpi,”- tha ai.
Viktima ishte vetëm katër vite më i rritur se vëllai, por sipas Xhulianos, ai kujdesej vazhdimisht për, aq sa ai e konsideronte si baba.
“Nuk ishte vetëm vëllai im. Ai ishte edhe babai im. Ai ka punuar gjithmonë dhe vetëm për të më çuar në Itali, për të gjetur një jetë më dinjitoze. Edhe kur fitonte 500 euro në muaj, sapo mbërriti në Itali, më ndau 300 për dokumentet e mia që të vija këtu të jetoja me të, në një apartament afër stacionit në Ankona. Ai u sakrifikua deri në pikën që më bëri të luaja edhe mua, të luaja në një ekip futbolli”, vijon ai.
Nga ana tjetër, ai tregon se personi që fillimisht u konfliktua me autorin e krimit ishte mik i veçantë për viktimën.
“Danilo është një person që ka bërë shumë për familjen tonë. Ai e ndihmoi Klajdin sapo mbërriti në Itali dhe i dha një punë, në kuzhinën e restorantit të tij. Ishte puna e tij e parë në Ankona. ajo që e ndihmoi të lërë mënjanë paratë e para, të gjejë një shtëpi, dhe më vonë e lejoi të më merrte edhe mua nga Shqipëria.Ne kemi marrëdhënie të shkëlqyera me ta dhe ndodh shpesh që të dalim bashkë, siç ndodhi të dielën. Nuk e kemi menduar kurrë se çfarë mund të ndodhë pas një dite relaksi, buzëqeshjeje dhe argëtimi”.
Klajdi Bitri, u vra me pushkë peshkimi nga një shtetas algjerian pasditen e së dielës. Viktima tentoi që të shuante gjakrat mes autorit dhe mikut të tij italian, por ndërhyrja rezultoi fatale për të riun shqiptar, i cili si shumë të tjerë, ishte vendosur në Itali për një jetë më të mirë.
