Ozkan Ulutash, gjeneralmajori i Ushtrisë Turke ka marrë sërish komandën e KFOR-it, pas përfundimit të mandatit të komandantit të ushtrisë italiane, Enrico Barduani.
Gjatë ceremonisë në Prishtinë gjeneralmajori Ulutash shprehu gatishmërinë dhe përkushtimin për përmbushjen e misionit paqeruajtës të KFOR jo vetëm në Kosovë por në të gjithë rajonin.
“Do ta bëjmë këtë përmes aktiviteteve të ndryshme në terren, por edhe përmes mbështetjes tonë të fuqishme për dialogun për normalizimin e raporteve mes Beogradit dhe Prishtinës, që është rruga drejt stabilitetit”, tha Ulutash.
Ulutash falënderoi paraardhësin e tij për punën dhe tha se është i gatshëm që të punojë drejt konsolidimit të mëtejshëm me autoritetet e Kosovës.
“KFOR është i gatshëm të trajtojë çdo zhvillim të sigurisë. Prioritet mbetet që të përmbushet misioni për të ofruar një mjedis të sigurt dhe liri të lëvizjes për të gjitha komunitetet”, tha Ulutash.
Të pranishëm në ceremoninë e ndërrimit të komandës të KFOR-it ishin edhe zyrtarë të lartë të institucioneve të Kosovës.
Presidentja Osmani falenderoi ushtarakët ndërsa tha se populli i Kosovës është mirënjohës për kontributin e misionit të NATO-s./vizionplus.tv
