Hungaria po mban “peng” paketën e 20-të të sanksioneve të BE-së ndaj Rusisë, tha për Euractiv një këshilltar i lartë i Volodymyr Zelenskyt, ndërsa Budapesti vazhdon të vërë veton ndaj raundit të fundit të masave kufizuese të Brukselit kundër Moskës.
Vladyslav Vlasiuk, i dërguari i presidentit ukrainas për sanksionet, tha se refuzimi i kryeministrit Viktor Orbán për të miratuar paketën po e pengon BE-në të ndërpresë shërbimet, të tilla si sigurimi për anijet që transportojnë naftë bruto ruse, të cilat janë “jetike” për ekonominë e luftës së Moskës.
Orbán dëshiron që Kievi të riparojë tubacionin Druzhba, i cili transporton naftën ruse në Hungari nëpërmjet Ukrainës, përpara se të miratojë masat. Sanksionet kërkojnë miratimin unanim të të 27 vendeve të BE-së.
“Para së gjithash, pse do ta përziente dikush paketën e sanksioneve me tubacionin e naftës?”, tha Vlasiuk.
“Dhe së dyti, nuk jemi ne ata që e shkatërruan tubacionin. Po bëjmë çmos ta restaurojmë atë, por kjo nuk është aq e lehtë, siç mund ta imagjinojë kushdo.”
Refuzimi i Orbán-it “duket shumë si marrja peng e paketës së sanksioneve”, shtoi ai.
Vetoja e Hungarisë, e kombinuar me refuzimin e saj për të nënshkruar një kredi prej 90 miliardë eurosh nga BE-ja për Ukrainën, ka përshkallëzuar ndjeshëm mosmarrëveshjen diplomatike që ka kohë që zien midis Budapestit dhe Kievit.
Përplasja vjen ndërsa Orbán, udhëheqësi më jetëgjatë i BE-së dhe më miqësor me Moskën, po shkon drejt zgjedhjeve parlamentare më 12 prill.
Kryeministri i ekstremit të djathtë e ka akuzuar vazhdimisht Kievin se mbështet udhëheqësin e opozitës hungareze Péter Magyar, partia e të cilit ‘Tisza’ kryeson ndaj ‘Fidesz’ të Orbán me rreth 20 pikë përqindjeje, sipas një sondazhi të publikuar të mërkurën.
Ukraina e ka mohuar këtë akuzë.
Kjo përballje vjen në një kohë kritike për Kievin, i cili pritet të mbetet pa para në prill dhe është përballur me sulme brutale ruse këtë dimër.
Brukseli shpresonte të miratonte si kredinë ashtu edhe paketën e sanksioneve deri të martën, përvjetori i katërt i pushtimit në shkallë të plotë të Rusisë, por në fund dështoi të bindte Budapestin.
