Procesi i regjistrimit online përmes portalit e-albania për të gjithë nxënësit që kanë përfunduar arsimin e detyruar 9-vjeçar dhe kanë zgjedhur gjimnazet e përgjithshme apo shkollat e mesme të orientuara, do të vijojë deri më datë 20 korrik.
Për herë të parë këtë vit, në klasat e 9-ta u integrua programi i zhvillimit të karrierës, me qëllimin që nxënësit ta kenë më të lehtë zgjedhjen që do të bëjnë.
“Këshillimi për zhvillimin e karrierës më ka ndihmuar të kuptoj se çfarë më pëlqen më shumë. Unë kam zgjedhur ekonomikun sepse aty do fokusohem edhe për studimet e larta.”
“Unë do të vazhdoj ekonomi”
“Jam nga shkolla koreografike dhe kaloj automatikisht në lice.”
Ekspertët e arsimit e vlerësojnë faktin që edukimi për zhvillimin e karrierës është integruar që në klasën e nëntë, ndërsa theksojnë se nevojitet trajnimi i mësuesve specifikë dhe që e njohin mirë tregun e punës.
ANA LLAZO
EKSPERTE ARSIMI
“Edukimi për zhvillimin e karrierës i ndihmon shumë nxënësit por edhe prindërit që të jenë më të qartë për talentin dhe aftësitë e fëmijës dhe të bëjnë një zgjedhje që i përshtatet më së miri.”
Kryesisht familjarët janë ata që ndikojnë në orientimin e nxënësve drejt arsimit të mesëm, por edhe për studimet e larta.
“Sipas studimit që kam kryer në qytetet kryesore të Shqipërisë, prindërit janë ata që ndikojnë më shumë në zgjedhjet e fëmijës, dhe zakonisht priren drejt degëve që mendohet se gjenerojnë më shumë të ardhura. Por nuk duhet të neglizhojmë aftësitë dhe talentin e çdo individi në rrugën për të patur sukses.”
Në shkollat e mesme profesionale dhe gjimnazet me kohë të pjesshme, regjistrimet online në klasat e 10-ta mund të kryhen deri më 30 shtator.