Pas padisë që Aleanca për Mbrojtjen e Teatrit Kombëtar bëri në SPAK ndaj ambasadorit të BE në Tiranë, Luigi Soreca, ka reaguar ministrja e Jashtme, Olta Xhaçka.
Duke e quajtur një mik të mirë të shqiptarëve, Xhaçka shprehet e keqardhur për akuzat e ngritura ndaj diplomatit, ndërsa përmendi mbështetjen dhe ndihmat që ka ofruar pas pasojave të tërmetit 2019 dhe trajtimin e pandemisë COVID.
“Luigi Soreca është një mik i mirë i Shqipërisë dhe popullit shqiptar. Një mik i cili ka shkuar dhe përtej detyrës së tij, për të ndihmuar shqiptarët me pasojat e tërmetit dhe pandemisë COVID-19. Një mik i vërtetë i cili ka mbështetur integrimin e vendit tonë 🇦🇱, edhe duke kritikuar qeverinë dhe politikën në rastin e gabimeve të bëra. Keqardhje për akuzat e bëra ndaj tij. E sigurt që Ambasadori Soreca gëzon respektin dhe mbështetjen e shumicës së popullit shqiptar”- shkruan në postimin e saj Xhaçka.